Ásta R. Jóhannesdóttir:
Herra forseti. Ég ætla að byrja á því að bera af mér sakir þar sem hæstv. ráðherra er hér með dylgjur í minn garð vegna upphæða sem ég nefni úr ríkisreikningi um verð á ríkisjörðum. Ég gæti náttúrlega lesið upp úr ríkisreikningi á hvað verið er að selja þessar jarðir, ef það er þá rétt að kalla það sölu. Það liggur nú við að þetta sé gjöf í einhverjum tilvikum. (Landbrh.: Ekki er þetta að bera af sér sakir?) Ég er að bera af mér sakir vegna þess að ég er að lesa hér beint upp úr ríkisreikningi tölur um það á hvað jarðir hafa verið seldar. Aftur á móti hefði hæstv. ráðherra örugglega losnað við þessi leiðindi ef hann hefði svarað spurningum mínum hér á þingskjali (Gripið fram í.) eins og ég á rétt á, herra forseti, samkvæmt niðurstöðu lögfræðinga nefndasviðs Alþingis, (Gripið fram í.) sem segja í svari til mín ...
(Forseti (GuðjG): Nú er hv. þm. komin út fyrir efnið.)
Ég er að bera hér af mér sakir vegna orða hæstv. ráðherra.
(Forseti (GuðjG): Hv. þm. er ekki að bera af sér sakir með því að fara að lesa hér upp úr ríkisreikningi.)
Ég vil einnig vísa í seinni umræðuna um störf þingsins. Það var alveg ljóst og kom fram í máli mínu að búið var að boða sjúkraliða á fund næstkomandi fimmtudag. (KHG: Hverjar eru sakir?) Það kom fram.