Byggðaáætlun fyrir árin 2002--2005.
Örlygur Hnefill Jónsson (Sf) (andsvar):
Herra forseti. Hæstv. samgönguráðherra hefur í ítarlegu máli sínu rætt um hvað samgöngumál, málaflokkur hans, skipta miklu máli fyrir byggðamál. Það er hárrétt og fær stuðning í skýrslu sem hér er rædd í dag frá Háskóla Íslands og Byggðarannsóknastofnun, að samgöngubætur séu þær aðgerðir sem best séu fallnar til þess að bæta afkomu og lífskjör á landsbyggðinni.
Menn eiga að njóta þess sem vel er gert og að mínu mati hefur margt verið vel unnið í samgöngumálum. Við sem búum á landsbyggðinni sjáum það. Sama gildir um ferðaþjónustuna. Hæstv. samgönguráðherra kom inn á hana og mikilvægi hennar og auðvitað brýnir maður hann til áframhaldandi góðra verka. Þetta er gríðarlega mikilvægt í byggðamálum, þ.e. samgöngumál og ferðaþjónusta.