Framkvæmd þingsályktunarinnar
Ferill 81. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 1749 — 81. mál.
Síðari umræða.
Nefndarálit með breytingartillögu
um tillögu til þingsályktunar um mótun heildstæðrar stefnu um afreksfólk í íþróttum.
Frá allsherjar- og menntamálanefnd.
Nefndin hefur fjallað um málið og bárust umsagnir frá Íþrótta- og Ólympíusambandi Íslands, Knattspyrnusambandi Íslands, UMFÍ og Hrafnhildi Lúthersdóttur.
Tillagan felur í sér að mennta- og menningarmálaráðherra móti heildstæða stefnu um afreksfólk í íþróttum. Samhliða tillögu þessari fjallaði nefndin um tillögu til þingsályktunar um launasjóð íslensks afreksíþróttafólks, sbr. 116. mál á yfirstandandi þingi.
Samhljómur var á meðal umsagnaraðila um mikilvægi þess að styðja afreksfólk í íþróttum. Bent var á að mikilvægt væri að frekari stefnumótun stjórnvalda færi heim og saman við þær áherslur sem íþróttahreyfingin setti fram á Íþróttaþingi ÍSÍ. Jafnframt var bent á íþróttastefnu ríkisins frá maí 2019 sem fæli í sér mikla samvinnu og samráð innan íþróttahreyfingarinnar. Þá var því fagnað hversu mjög stjórnvöld beindu sjónum sínum að íþróttastarfsemi hér á landi um þessar mundir.
Nefndin tekur heilshugar undir framangreind sjónarmið og beinir því jafnframt til ráðuneytisins að horft verði til áðurnefndrar þingsályktunartillögu um launasjóð afreksíþróttafólks, sbr. 116. mál, í stefnumótunarvinnunni.
Nefndin leggur til að þingsályktunartillagan verði samþykkt með eftirfarandi
BREYTINGU:
Í stað dagsetningarinnar „1. júní 2021“ komi: 1. júní 2022.
Silja Dögg Gunnarsdóttir og Þorsteinn Sæmundsson voru fjarverandi við afgreiðslu málsins en skrifa undir álit þetta samkvæmt heimild í 2. mgr. 29. gr. laga um þingsköp Alþingis, nr. 55/1991.
Alþingi, 12. júní 2021.
Páll Magnússon, form. |
Þorbjörg Sigríður Gunnlaugsdóttir, frsm. |
Guðmundur Andri Thorsson. |
Bjarkey Olsen Gunnarsdóttir. | Birgir Ármannsson. | Silja Dögg Gunnarsdóttir. |
Steinunn Þóra Árnadóttir. | Þorsteinn Sæmundsson. | Þórhildur Sunna Ævarsdóttir. |