breyting á ýmsum lögum vegna hækkunar lágmarksiðgjalds til lífeyrissjóðs og ákvæða um tilgreinda séreign.
Virðulegur forseti. Rétt áður en hæstv. ráðherra hóf framsögu sína barst þingmönnum bréf frá Alþýðusambandi Íslands. Hafi ráðherra ekki haft tök á því að kíkja á tölvupósthólfið sitt þá birtust sambærilegar fréttir í Morgunblaðinu í morgun, sem ég reikna með að ráðherra kíki kannski oftar á en tölvupóstinn hér á þingi, þar sem Alþýðusambandið gerir alvarlegar athugasemdir við málsmeðferð ráðuneytisins í þessu máli. Það gengur svo langt að segja að fjármálaráðherra sé að brjóta blað í sögunni með því að fara fram með tillögur um breytingar á lífeyriskerfinu án samráðs við fulltrúa vinnandi fólks, en láti í veðri vaka að svo hafi verið. Það segir Alþýðusambandið að sé vegna þess að í frumvarpinu sé látið eins og það sé í heild sinni unnið í samráði, en reyndin sé hins vegar sú að hið minnsta þrjú veigamikil atriði í frumvarpinu séu þvert á óskir verkalýðshreyfingarinnar.
Mig langar að fá ráðherra til að gera þingheimi grein fyrir þessu af því að þetta snýst ekki um ólíka sýn okkar á útfærslu í þessu frumvarpi, eins og mátti (Forseti hringir.) heyra varðandi sum atriði hjá ráðherranum, heldur bara grundvallarverklag þegar kemur að því að ræða um réttindi vinnandi fólks.