breyting á dönskum lögum um móttöku flóttamanna.

Virðulegur forseti. Ég þakka hv. þingmanni fyrir. Hann er þá væntanlega að spyrja að því hvort við myndum einhliða vilja vinna með Dönum að því að hætta að taka á móti fólki í gegnum alþjóðlega verndarkerfið og aðeins taka á móti fólki í gegnum kvótaflóttamannakerfið. Ég held að ná þurfi breiðari samstöðu um verkefnið í allri Evrópu og tel einsýnt að staða þessara mála gæti verið betri í dag. Ná þarf meiri samstöðu og meiri árangri í Evrópu svo það skili sér fyrir fólk sem er á flótta. Það eru yfir 26 milljónir manna á flótta í heiminum og í kvótaflóttamannakerfinu er ákveðin forgangsröðun, þar er fólk sem er í mestu neyðinni og kemst ekki hingað af sjálfsdáðum. Þess vegna höfum við líka verið að reyna að fjölga í þeim hópi hérlendis og reyna að hafa kerfið okkar um alþjóðlega verndarhlutann sambærilegt því sem gerist í löndunum í kringum okkur, svo þar verði þeim að sama skapi forgangsraðað sem eru í mestu neyðinni og hafa ekki alþjóðlega vernd annars staðar. Einnig er frumvarp hér í þinginu til að hraða þeirri málsmeðferð til að hún sé sambærileg því sem gerist í löndunum í kringum okkur. Ég held að þær breytingar séu nauðsynlegar til að ná betri árangri í þessum málaflokki og til að hjálpa fleirum af þeim sem koma hingað og þurfa á alþjóðlegri vernd að halda. Á meðan löndin í Evrópu eru svona ósamstiga tel ég mikilvægt að við mörkum okkur skýra stefnu um hvernig við ætlum að hjálpa þeim sem þurfa mest á því að halda í þessu kerfi.

(Forseti (SJS): Forseti biðst velvirðingar á því að það er einhver ólund í klukkunni og tímamælingunni, en forseti reynir að finna út úr því upp við forsetaborðið.)