Störf þingsins.

Virðulegi forseti. Haustveðrin koma svo sannarlega með látum í ár og nú þegar hafa gengið yfir tvö veður sem bæði höfðu áhrif á dreifi- og flutningskerfi raforku auk ýmislegs annars. Í kjördæmaviku hittum við þingmenn Norðausturkjördæmis fulltrúa Landsnets og Rarik og fórum yfir stöðu raforkukerfisins. Þótt það hafi orðið raforkutruflanir í þessum verð veðrum sýndi það sig svo sannarlega að framkvæmdir síðustu ára skila árangri og auka raforkuöryggið verulega. Verkefni eins og Hólasandslína 3, Kröflulína 3, yfirbyggð tengivirki og dreifikerfi í jörð skipta sköpum þegar svona veður ganga yfir. Það liggur jafnframt fyrir að með frekari reynslu og þjálfun við að nýta sjálfvirkni nýrra mannvirkja er hægt að gera enn betur. Starfsmenn þessara fyrirtækja unnu hörðum höndum meðan á veðrunum stóð og í kjölfarið stýrðu kerfum í takt við áhrif veðursins, gerðu við staura, þrifu seltu, börðu niður ísingu, komu upp varaafli og þurftu meira að segja að vefja bárujárnsplötur utan um spenni á rafmagnsstaur. Samt sem áður bjuggu íbúar á einstökum bæjum og í einstökum sveitum við rafmagnsleysi klukkustundum saman. Þetta gerðist þar sem dreifikerfið er ekki komið í jörð eins og á Jökuldal, í Bárðardal, á suðurfjörðum Austfjarða og víðar. Lengstu kaflar dreifikerfisins sem enn eru tengdir með loftlínu eru á Austurlandi. Eftir aðventustorminn 2019 var áætlun um að koma dreifikerfi Rarik í jörð flýtt og nú er áætlað að ljúka því verkefni 2030. Í ljósi nýliðinna atburða og kröfu um þriggja fasa rafmagn í svo til allri nýsköpun og atvinnuuppbyggingu til sveita tel ég að við getum ekki beðið svo lengi. Stjórnvöld verða að stuðla að hraðari vinnu við að koma dreifikerfinu í jörð og jafnframt uppbyggingu byggðalínunnar.