28.04.1911
Efri deild: -1. fundur, 22. löggjafarþing.
Sjá dálk 955 í B-deild Alþingistíðinda. (813)
68. mál, gerðardómur í brunabótamálum
Ráðherra (Kr. J.):
Eg býst við að það verði skipuð nefnd í þetta mál, því að það er að ýmsu leyti athugavert. Vil eg leiða athygli hinnar háttvirtu deildar og væntanlegrar nefndar að einu aðalákvæði frumvarpsins, sem er í 1. grein þess, og fer í þá átt, að skylt skuli vera að leggja ágreining í brunabótakröfumálum undir gerðardóm.
Hér er gjörsamlega farið í bága við það sem frá alda öðli hefir verið í lögum hér á landi, að hver og einn mætti eða gæti snúið sér til dómstólanna, þegar hann vildi eða þyrfti að fá útkljáðan ágreining um réttarspursmál.
Og mikil áherzla hefir jafnan verið lögð á það, að engan mætti draga frá sínu, varnarþingi. En hér er einstökum mönnum eða félögum varnað að leita til dómstólanna til að ná rétti sínum, ef frumv. þetta verður að lögum. Þetta er svo athugavert, að deildin þarf að íhuga frv. grandgæfilega, enda vænti eg þess, að nefnd verði skipuð til að taka það til meðferðar.