Lífeyrissjóður sjómanna, 2. umræða.
Frú forseti. Ég mæli fyrir nefndaráliti frá hv. efnahags- og viðskiptanefnd um frumvarp til laga um afnám laga nr. 45/1999, um Lífeyrissjóð sjómanna, með síðari breytingum.
Nefndin hefur fjallað um málið og fengið á sinn fund Ólaf Pál Gunnarsson frá fjármálaráðuneyti. Umsagnir um málið bárust frá Landssamtökum lífeyrissjóða og Lífeyrissjóði sjómanna.
Í frumvarpinu er lagt til að lög nr. 45/1999, um Lífeyrissjóð sjómanna, verði afnumin frá og með 1. janúar nk. og að lífeyrissjóðurinn starfi frá þeim tíma á grundvelli laga nr. 129/1997, um skyldutryggingu lífeyrisréttinda og starfsemi lífeyrissjóða.
Í umsögn Lífeyrissjóðs sjómanna kemur fram að sjóðurinn hefur leitað eftir því að lögin verði felld úr gildi og stjórn sjóðsins styðji málið. Landssamtök lífeyrissjóða mæla einnig með afnámi laganna.
Í umfjöllun nefndarinnar kom fram að tryggt sé talið að sjóðsfélagar glati ekki réttindum við breytinguna.
Nefndin leggur til að málið verði samþykkt óbreytt.
Gunnar Birgisson var fjarverandi við afgreiðslu málsins.
Undir nefndarálitið rita Pétur H. Blöndal, Dagný Jónsdóttir, Birgir Ármannsson, Jóhanna Sigurðardóttir, Lúðvík Bergvinsson, Siv Friðleifsdóttir, Ögmundur Jónasson, með fyrirvara, og Einar Már Sigurðarson.
Hæstv. forseti. Það var rétt sem fram kom í máli hv. þm. Péturs H. Blöndals að bæði stjórn Lífeyrissjóðs sjómanna og Landssamband lífeyrissjóðanna mæla með því að frumvarpið verði samþykkt, að sérlögin verði numin úr gildi, en ástæða þess að ég er með fyrirvara er sú að ég vildi nota þetta tækifæri til að vekja athygli á því að ríkisvaldið hefur í rauninni aldrei staðið við skuldbindingar sínar hvorki gagnvart lífeyrissjóðnum né sjómönnum.
Lífeyrissjóður sjómanna hefur átt í miklum erfiðleikum og eru ýmsar ástæður fyrir því. Örorka er mjög mikil í röðum sjómanna og hefur það valdið því að byrðarnar á þann lífeyrissjóð eru þyngri en gerist almennt hjá öðrum lífeyrissjóðum og hefur það leitt til þess að lífeyrisréttindi sjómanna hafa aftur og ítrekað verið skert með lögum og hefur mörgum sjómanninum og landsmanni sviðið að horfa upp á það, ekki síst í ljósi þess að samtök sjómanna hafa talið og fullyrt að ríkisvaldið hafi aldrei staðið við skuldbindingar sem gefnar voru í tengslum við kjarasamninga upp úr 1980. Þá voru gerðir kjarasamningar þar sem fyrirheit voru gefin um að komið yrði til móts við sjómenn með því að styrkja lífeyrissjóð þeirra. Um þetta hafa oft farið fram umræður á Alþingi. Hv. þm. Guðjón A. Kristjánsson, formaður Frjálslynda flokksins, flutti þingmál sem lýtur að því að styrkja Lífeyrissjóð sjómanna og við í Vinstri hreyfingunni – grænu framboði höfum tekið undir málflutning hans. Ég vildi aðeins nota tækifærið nú til að árétta sjónarmið okkar hvað þetta snertir.