Virðulegi forseti. Hér er um að ræða skattahækkunarfrumvarp ríkisstjórnarinnar. Nú er ætlunin að hækka álögur á vatn, hita og rafmagn. Þar er borið niður í þessu tiltekna frumvarpi.

Þeir sérfræðingar sem komu á fund hv. efnahags- og viðskiptanefndar töluðu allir um að þetta mundi leiða til hækkunar. Það liggur einnig fyrir að ríkisstjórnin hefur ekki lagt í neina vinnu, enga, til að kanna hvaða afleiðingar þetta kunni að hafa í för með sér.

Í yfirferð efnahags- og viðskiptanefndar var einnig á það bent að langtímaraforkusamningar við stóriðju gera það að verkum að engar breytingar verða á þeim samningum. Hækkunin mun nánast alfarið falla á almenning í þessu landi og ekki aðeins það heldur hefur einnig verið bent á að hækkunin muni leiða til mikillar tilfærslu á fjármunum frá sveitarfélögum yfir til ríkisins. Í samhljóða ályktun og bókun borgarráðs fyrir nokkrum dögum segir m.a., með leyfi forseta:

„Samkvæmt samantekt Sambands íslenskra sveitarfélaga hefði þessi skattlagning orkufyrirtækja sveitarfélaga numið um 1,1 milljarði króna á árunum 2002 og 2003.“

Það er því alveg ljóst að með þessum aðgerðum er vegið að sveitarfélögunum og ríkið er á nokkurn hátt að kalla til sín þá fjármuni sem það nýlega hefur verið gert samkomulag við sveitarfélögin um að láta þau hafa.

Virðulegi forseti. Það er alveg ljóst að Samfylkingin mun ekki styðja þetta mál og mun því segja nei.

Frú forseti. Hér kemur til atkvæðagreiðslu frumvarp frá fjármálaráðherra um skattskyldu orkufyrirtækja. Megintilgangur frumvarpsins er sá að samræma skattalöggjöf á sviði raforku, þ.e. á orkufyrirtæki, í landinu. Við meðferð málsins í efnahags- og viðskiptanefnd lagði ég fram þá hugmynd að hægt væri að nálgast megintilgang frumvarpsins með öðrum hætti en gert er með þessu frumvarpi, þ.e. að heimila einkafyrirtækjum sem eru í orkuframleiðslu í landinu, sem sagt ekki í opinberri eigu, frekar að starfa undir sömu skattalöggjöf og orkufyrirtæki í opinberri eigu gera í dag. Þar með yrði megintilgangi frumvarpsins náð.

Það kemur fram í nefndaráliti meiri hlutans um þetta mál, virðulegi forseti, að erfitt sé að meta áhrif breytinga á orkuverð og arðsemi orkufyrirtækja. Þetta eru mjög óábyrg orð að mínu mati, frú forseti, sérstaklega í ljósi þess að umsagnir sem hafa borist efnahags- og viðskiptanefnd um málið frá orkufyrirtækjum í opinberri eigu eru öll samhljóma um það að orkuverð í landinu muni hækka ef til samþykktar á þessu frumvarpi kemur í óbreyttri mynd.

Við í Frjálslynda flokknum munum greiða atkvæði á móti þessu frumvarpi. Engu að síður munum við leggja fram breytingartillögu sem miðar að því að gildistaka frumvarpsins í heild sinni frestist frá 2006 til 2013 og að í millitíðinni, þ.e. á miðju næsta kjörtímabili, árið 2009, verði skipuð nefnd sem kanni rækilega og fari ofan í kjölinn á því hvaða áhrif breytingar af þessu tagi muni hafa á orkuverð í landinu.