Frú forseti. Með breytingartillögu stjórnarandstöðunnar sem hér verða greidd atkvæði um er gerð lokatilraun til að leiðrétta alvarlega ágalla á frumvarpinu sem fjöldi umsagnaraðila eins og Umhyggja, félag til stuðnings langveikum börnum, Þroskahjálp og landlæknisembættið hafa gert mjög alvarlegar athugasemdir við.

Í fyrsta lagi er um að ræða að gildissvið laganna er mjög þröngt sem mismunar verulega foreldrum sem búa við sambærilegar aðstæður. Þannig fá foreldrar þeirra langveiku og fötluðu barna sem greindust fyrir síðustu áramót engar greiðslur þó að aðstaða þeirra barna sé nákvæmlega söm og þeirra sem fæddust eftir áramótin. Í nokkrum tilvikum er það svo að foreldrar hafa þurft að vera árum saman utan vinnumarkaðar vegna fötlunar barna sinna sem ekkert munu fá með þessum lögum. Framkvæmdastjóri Umhyggju hefur sagt að margir foreldrar séu sárreiðir vegna þessa misræmis sem er á réttarstöðu langveikra barna.

Í öðru lagi er um að ræða þrepainnleiðingu á lögunum sem ekki koma að fullu til framkvæmda fyrr en á árinu 2008. Þó er þar aðeins um að ræða útgjöld upp á 130 millj. kr. þegar lögin eru að fullu komin til framkvæmda. Það hefur þau áhrif að foreldrum sem búa við nákvæmlega sambærilegar aðstæður er mjög mismunað og það svo að foreldri alvarlega fatlaðs barns sem greindist í desember á þessu ári getur fengið greiðslur þremur mánuðum skemur en barn sem greinist örfáum dögum seinna, þ.e. í byrjun ársins á eftir. Á þessu er tekið í þeim tveimur breytingartillögum sem er að finna á þskj. 896, enda er um að ræða svo mikið misræmi á réttarstöðu hjá foreldrum veikra barna í sambærilegri aðstöðu að það getur varla verið annað en brot á jafnræðisreglu stjórnarskrárinnar.

Verði breytingartillaga okkar í stjórnarandstöðunni felld munum við engu að síður samþykkja frumvarpið því að hér er um framfaraspor að ræða, að fá þessa viðurkenningu á réttarstöðu fatlaðra barna á lögbókina en það er þá gert í þeirri trú að sem fyrst, og þá þegar á næsta þingi, verði þessir alvarlegu annmarkar á lögunum leiðréttir.