olíugjald og kílómetragjald o.fl., 3. umræða.
Hæstv. forseti. Ég vil í örstuttu máli vekja athygli á breytingartillögu sem ég hef flutt við frumvarpið hér við 3. umr. málsins ásamt hv. þingmönnum Dagnýju Jónsdóttur, Kristjáni L. Möller, Ögmundi Jónassyni og Guðjóni A. Kristjánssyni.
Í breytingartillögunni er gert ráð fyrir að felldur verði út úr frumvarpinu sá áskilnaður að bifreiðar í eigu björgunarsveita greiði sérstakt kílómetragjald eins og gert er ráð fyrir í 2. gr. frumvarpsins.
Einnig er breyting í breytingartillögunni um að bifreiðar björgunarsveita sem eru 10 tonn eða meira séu undanskildar almenna kílómetragjaldinu í 1. tölulið 1. mgr. 13. gr. laganna og er það til að gæta samræmis innan frumvarpsins verði breytingartillögurnar samþykktar.
Þá felst í breytingartillögunum að gert er ráð fyrir að auðkenna skuli bifreiðar björgunarsveita með sérstökum hætti í ökutækjaskrá.
Ég ætla ekki að fara mörgum orðum um þetta mál, það hefur fengið nokkra umræðu í meðförum þingsins. Breytingartillögur þessar lúta að því að koma til móts við þau sjónarmið að þar sem björgunarsveitir eru sjálfboðaliðasamtök sem gegna afar mikilvægu og sérstöku hlutverki í þjóðfélagslegum skilningi sé eðlilegt að þær búi við skattalega hagkvæmt fyrirkomulag hvað þetta varðar. Frumvarpið, eins og það var lagt fram á þingi, gerði vissulega ráð fyrir því að um bifreiðar björgunarsveita giltu ákveðnar sérreglur en með þessari breytingartillögu er gengið lengra í þeim efnum með því að fella alveg niður skattheimtu á það eldsneyti sem björgunarsveitir nota á bifreiðar sínar. Ég vonast til þess að hv. þingmenn geti stutt þessa breytingu í ljósi þeirrar sérstöðu sem starfsemi björgunarsveitanna í landinu hefur.
Frú forseti. Það er sannarlega ánægjulegt þegar stjórn og stjórnarandstaða ná saman um mál eins og hér er. Fulltrúar stjórnarandstöðunnar á Alþingi greiddu atkvæði gegn þessari 2. gr. í morgun og sá sem hér talar varaði líka við 1. umr. við þeirri leið sem þar átti að fara. Ég fagna því að björgunarsveitir landsins skuli fá að kaupa gjaldfrjálsa olíu. Í þessu frumvarpi var sá galli að menn ætluðu að fara að byggja ofan á þungaskattskerfið sem átti að leggja af með upptöku olíugjaldsins og búa til þungaskattskerfi fyrir björgunarsveitabíla landsins.
Ég sagði hér í morgun að það hefði haft í för með sér kostnað fyrir björgunarsveitirnar upp á 70 þúsund á hvern bíl, 200 bílar alls eða 14 millj. kr. Þar að auki hefði orðið mikill kostnaður við að færa bíla til aflestrar eins og var í gamla daga og fyrir fulltrúa ríkisins í fjármálaráðuneytinu að framfylgja þeirri stefnu og innheimta eftir þessu kerfi. Ég get því ekki annað, virðulegi forseti, en komið hér upp og fagnað því að augu stjórnarliða hafa opnast hvað þetta varðar. Sú vonda tillaga sem þarna var er hér felld brott með hinni þverpólitísku tillögu sem hv. þm. Birgir Ármannsson hefur mælt fyrir og flutt er af hv. þingmönnum Dagnýju Jónsdóttur, Ögmundi Jónassyni, Guðjóni A. Kristjánssyni og þeim sem hér stendur. Þetta er fagnaðarerindi, fagnaðarefni. (Gripið fram í.) Já, það getur verið fagnaðarerindi líka þetta hvað varðar björgunarsveitirnar. (Gripið fram í.)
Það er rétt að vekja athygli þingheims á því, þegar rökstyðja þarf hvers vegna þetta var gert, að björgunarsveitir landsins greiða í kringum 7–10 millj. kr. í bensíngjald, sem rennur m.a. til Vegagerðarinnar, fyrir að nota bensín á björgunarsveitabáta og snjósleða sem aldrei aka um þjóðvegi landsins. Eins og þetta var fram að gildistöku þessara laga þurftu björgunarsveitirnar að borga olíugjald af snjóbílum sem aka meðal annars uppi á jöklum. Það er líka rétt að vekja athygli á því að hæstv. fjármálaráðherra þarf ekki að harma hlutinn sinn hvað þetta varðar þó að nokkrar tekjur renni þarna úr eða skattheimtan minnki til ríkissjóðs af þessu. Í gögnum frá fjármálaráðuneytinu er það staðfest við efnahags- og viðskiptanefnd vegna vinnslu þessa máls að tekjur ríkissjóðs af olíugjaldinu á þessu ári eru áætlaðar 1.500 millj. kr. meiri en gert var ráð fyrir í fjárlögum. Það hefur nú einhvern tíma heyrst úr þessum ræðustól að sú skattheimta sé á þeirri ferð sem hún er. Sá sem hér talar hefur oft bent á það en hann hefur aldrei fengið þvílík og önnur eins gögn úr fjármálaráðuneytinu sem staðfesta það.
Nú sé ég að ég fær merki víða úr salnum sem á körfuboltamáli þýðir að tíminn sé úti. Ég læt hér lokið máli mínu en fagna málalyktum.
Virðulegi forseti. Ég fagna því að þverpólitísk samstaða hafi náðst um þetta mál. Við flutningsmenn erum sammála um sérstöðu björgunarsveita og er hér verið að tryggja góða sátt um skattaumhverfi þeirra. Ég hvet alla hv. þingmenn til að samþykkja þessa tillögu.