Virðulegur forseti. Hv. 9. þm. Suðvest. spyr um uppbyggingu hjúkrunarheimilis í Mosfellsbæ, hvort áætlun ráðuneytisins frá árunum 2002–2007 um að veita 100 millj. kr. til þessa verkefnis hafi gengið eftir, hvort ég hyggist beita mér fyrir uppbyggingu hjúkrunarheimilis í Mosfellsbæ, hvenær framkvæmdir muni hefjast og þá hvenær áætlað sé að heimilið taki til starfa.

Virðulegur forseti. Því er til að svara að í áætlunum heilbrigðis- og tryggingamálaráðuneytisins hefur verið horft til þess að í Mosfellsbæ er ekkert hjúkrunarheimili. Það er óviðunandi til lengdar fyrir svo stórt bæjarfélag. Mosfellingar hafa þó ekki verið úrræðalausir því að gott samstarf hefur verið milli bæjarfélagsins og hjúkrunarheimilisins Eirar um vistun aldraðra íbúa bæjarfélagsins sem þurft hafa á hjúkrunarvist að halda.

Mosfellsbær hefur staðið ágætlega að uppbyggingu þjónustu við aldraða í bæjarfélaginu, bæði varðandi húsnæðismál, með uppbyggingu þjónustuíbúða, með heimaþjónustu fyrir aldraða og öðrum stuðningi við aldraða sem búa heima. Þá eru níu dagvistarrými í Hlaðhömrum sem einnig eru til mikils stuðnings öldruðum í heimahúsum.

Virðulegi forseti. Spurt er hvort fylgt hafi verið eftir áætlun ráðuneytisins fyrir árin 2002–2007 sem gerði ráð fyrir 100 millj. kr. uppbyggingu hjúkrunarheimilis í Mosfellsbæ. Áhersla hefur verið lögð á fjölgun hjúkrunarrýma þar sem þörfin hefur verið brýnust. Brýnasta þörfin hefur m.a. verið í Reykjavík þar sem ákveðið var að byggja upp 200 rými. Þau eru að rísa á næstunni. Lögð hefur verið áhersla á hjúkrunarheimili við Suðurlandsbraut og á Lýsislóðinni.

Samkvæmt niðurstöðum nefndar hæstv. forsætisráðherra, með fulltrúum stjórnvalda og aldraðra, var ákveðið að auka verulega fé til uppbyggingar nýrra hjúkrunarrýma og skiptir miklu að verja þeim fjármunum vel. Það er mat okkar að þau sveitarfélög þar sem brýnast er að sinna uppbyggingu séu Kópavogur, Mosfellsbær, Hafnarfjörður, Garðabær, Reykjanesbær, Árborg og Ísafjörður. Áætlun stjórnvalda um uppbyggingu á þessum stöðum kynnti ég nýlega opinberlega. Jafnframt hef ég átt fund með fulltrúum áðurtalinna bæjarfélaga til að ræða fyrirhugaðar framkvæmdir og ákveðið að skipa samráðshópa um framkvæmdir á hverjum stað með fulltrúum viðkomandi bæjarfélags og ráðuneyti.

Samkvæmt ákvörðun minni verða byggð 20 hjúkrunarrými í Mosfellsbæ. Ég átti nýlega fund með fulltrúum sveitarstjórnar Mosfellsbæjar vegna þessa nýja hjúkrunarheimili. Gert er ráð fyrir að undirbúningur framkvæmda hefjist um mitt næsta ár og framkvæmdir hefjist síðari hluta ársins 2008. Gangi áætlanir ráðuneytisins eftir má ætla að nýtt hjúkrunarheimili í Mosfellsbæ geti tekið til starfa í lok árs 2008.

Eftir að fyrirspurn hv. þingmanns var lögð fram hefur staðan gjörbreyst. Nú er búið að taka ákvörðun um byggingu nýs hjúkrunarheimilis í Mosfellsbæ. Ég tel að það hafi verið mjög brýn ákvörðun vegna þess sem koma fram í máli hv. þingmanns, að ekkert rými er innan sveitarfélagsins. Mosfellsbær hefur verið í samstarfi við Eir þannig að aldraðir Mosfellingar hafa þurft að fara út fyrir bæjarfélagið. Ég tel eðlilegt að við byggjum á nokkrum stöðum á höfuðborgarsvæðinu upp hjúkrunarrými og hjúkrunarheimili sem ekki þurfa að vera stórar byggingar með mjög mörgum rýmum. Við höfum færst frá þeirri hugmyndafræði sem ríkti á sínum tíma, að byggja mjög stórar einingar. Þá var talað um hagkvæmni í slíkum byggingum en nú hafa menn færst í átt að því að byggja víðar og byggja sums staðar minni einingar. Þarna er verið að ræða um 20 rýma einingu.

Hins vegar munu gjöldin sem fara til rekstrar, þ.e. daggjöldin, taka mið af stærð heimila. Við munum borga álag á þeim heimilum sem eru minni eða lítil. Heimili með 20 manns og færri fá t.d. 6% álag á daggjöld. Þau sem eru með 40 eða færri fá 4% álag og þau sem eru 60 manna eða færri fá 2% álag. Þannig verður tekið tillit til þeirra eininga sem eru óhagkvæmari í rekstri.

Hæstv. forseti. Það sem skiptir máli við uppbyggingu hjúkrunarrýma er þetta: Í fyrsta lagi liggur fyrir að innan skamms verður hafist handa við að byggja 200 ný hjúkrunarrými í Reykjavík, 110 rými við Suðurlandsbraut og 90 rými á svokallaðri Lýsislóð. Hæstv. heilbrigðisráðherra hefur síðan lýst því yfir nýlega að til standi að byggja 174 ný hjúkrunarrými, þar af 20 í Mosfellsbæ. Því er ljóst að fram undan er stórkostleg uppbygging á hjúkrunarrýmum í Mosfellsbæ, víðar í Suðvesturkjördæmi, hér á höfuðborgarsvæðinu, Ísafirði og fleiri stöðum.

Það er ljóst að stjórnarmeirihlutinn og hæstv. heilbrigðisráðherra standa sig gríðarlega vel í þessum efnum.

Herra forseti. Ég þakka hæstv. ráðherra fyrir skýr svör og fagna því að hjúkrunarheimili í Mosfellsbæ skuli loks komið á framkvæmdaáætlun. Ég ætla rétt að leyfa mér að minnast á að ekkert annað sveitarfélag af sömu stærðargráðu er án hjúkrunarheimilis í dag. Á næstu árum er talið að 65 ára og eldri muni fjölga hlutfallslega mest í Mosfellsbæ.

En ég þakka fyrir skýr svör og fagna þessum áfanga.

Virðulegur forseti. Já, ég heyri að hv. þingmaður talar í sama anda og sveitarstjórnin í Mosfellsbæ, þar sem menn eru fullir bjartsýni og ánægðir með þessa ákvörðun. Þeir eru komnir á fullt í að undirbúa hvernig eigi að standa að þessu með okkur.

Ég vil taka fram að við ræddum um hjúkrunarrými almennt í fyrirspurnatíma fyrr á árinu, í vor. Það var löngu áður en niðurstaðan varð ljós úr samstarfi okkar við Landssamband eldri borgara í nefnd Ásmundar Stefánssonar. Sú niðurstaða varð til þess að við fengum inn aukið fé til uppbyggingar á þessum rýmum. En þá dró ég fram að búið væri að byggja í kringum 3 þús. hjúkrunarrými, það fer eftir því hvernig þau eru skilgreind. Fjöldi þeirra er hins vegar öðru hvoru megin við töluna 3 þús. í dag og þá sagði ég að við værum líklega búin að byggja upp um 88% af þeim rýmum sem við þyrftum og byggja þyrfti um 12% í viðbót. Ég nefndi þá að við þyrftum að byggja 370–380 ný rými á næstunni. Við erum einmitt að gera það. Það er erfitt að áætla þetta en við áætlum að með þeim rýmum sem við byggjum upp á næstu fjórum árum, sem eru 374 nákvæmlega, 200 í Reykjavík og 174 í nágrannasveitarfélögunum, Selfossi, Reykjanesbæ og Ísafirði, þá náum við líklega að anna eftirspurninni, að því gefnu að við aukum heimahjúkrun og félagslega heimaþjónustu sem við ætlum að gera og fjármagn hefur verið tekið til hliðar fyrir.

Þar með er þó ekki sagt að verkefnið sé búið. Síðar þarf að endurbyggja gömul rými sem eru óhentug í dag, þar sem eru fjölbýli og rými með salerni á gangi en ekki inni í rýminu sjálfu o.s.frv. Verkefnið er því ekki búið þrátt fyrir að við sjáum fram á að endar nái saman í fjölda rýma.