stuðningur við innrásina í Írak.
Hæstv. forseti. Fyrir þinginu liggur tillaga til þingsályktunar frá formönnum þingflokka stjórnarandstöðunnar um að ríkisstjórninni verði falið að taka Ísland með formlegum hætti út af lista þeirra 30 þjóða sem studdu innrás Bandaríkjamanna og Breta í Írak vorið 2003. Ríkisstjórnin og stjórnarmeirihlutinn á Alþingi hefur ekki viljað verða við þessu og jafnvel fullyrt að þessi listi sé ekki til. Hæstv. iðnaðarráðherra og formaður Framsóknarflokksins sagði í umræðu á þinginu fyrir fáeinum dögum að listinn væri í reynd ekkert annað en fréttatilkynning úr Hvíta húsinu, einhliða tilbúinn af Bandaríkjastjórn. Varaformaður Framsóknarflokksins hefur af svipuðu tilefni lýst því yfir að Íslendingar hafi verið misnotaðir, óafvitandi, af Bandaríkjastjórn í þessu efni.
Hæstv. forseti. Nú er hægt að sýna fram á að þetta er ekki rétt. Fyrir því eru óyggjandi heimildir. Í DV í marsmánuði árið 2003 er allítarlegt viðtal við þáverandi forsætisráðherra Davíð Oddsson þar sem hann er spurður út í þessi efni. Hann segir að Bandaríkjastjórn hafi verið fullkunnugt um staðfastan stuðning íslensku ríkisstjórnarinnar við yfirvofandi hernað, við hernaðaráformin.
Hann segir, með leyfi forseta:
„Þegar við fengum boð um að fá að vera í hópi hinna staðföstu bandalagsþjóða svikumst við að sjálfsögðu ekki undan merkjum.“
Með öðrum orðum barst formleg beiðni og við henni var orðið. Það er óumflýjanlegt, hæstv. forseti, að þessar upplýsingar liggi fyrir í þinggögnum. Ég beini þeirri spurningu til hæstv. forsætisráðherra hvort hann geti staðfest (Forseti hringir.) að hér sé rétt farið með af hálfu forvera hans í embætti forsætisráðherra Íslands.
Virðulegi forseti. Enn á ný taka stjórnarandstæðingar upp þetta sama mál. Það liggur fyrir að ákvörðun var tekin af til þess bærum aðilum árið 2003 um að Íslendingar heimiluðu hér yfirflug, heimiluðu lendingar og veittu 300 millj. kr. framlag, á fjáraukalögum að mig minnir, til uppbyggingar í Írak. (Gripið fram í: 90 milljónir …) Allt hefur þetta legið fyrir um langa hríð og verið margrifjað upp. Þetta voru þær ákvarðanir sem teknar voru hér af hálfu íslenskra yfirvalda.
Um hvernig nákvæmlega var staðið að lista Bandaríkjastjórnar um hinar staðföstu þjóðir er mér ekki kunnugt. Satt að segja skiptir það harla litlu máli núna, árið 2007. Það liggur fyrir, eins og ég hef sagt hér í þessum ræðustól, að við létum það átölulaust af okkar hálfu að við værum í hópi þessara ríkja með Dönum og fjöldamörgum öðrum vina- og bandalagsþjóðum okkar í Evrópu, eins og Bretum og Spánverjum, og mörgum þjóðum í Mið- og Austur-Evrópu. Þessar staðreyndir liggja fyrir, virðulegi forseti.
Hvað vakir fyrir þingmanninum með því að vera að rifja þetta upp núna verður hann sjálfur að segja frá.
Hæstv. forseti. Rétt skal vera rétt. Framsóknarflokkurinn er að sveipa þessi mál reyk, hann reynir að þvo hendur sínar í málinu. Við skulum ekki drepa umræðunni á dreif. Það sem fyrrverandi forsætisráðherra, forveri hæstv. ráðherra, segir í blaðaviðtali er að formlegt boð hafi borist íslenskum stjórnvöldum og að ákvörðun hafi verið tekin um að verða við því boði og fá að vera með á listanum yfir hinar staðföstu þjóðir.
Ef þetta er rétt falla dauð og ómerk orð fulltrúa Framsóknarflokksins um að flokkurinn hafi verið misnotaður og ekkert vitað hvað var í reynd að gerast. Hvort það skiptir máli að fara rétt með skal hæstv. ráðherra eiga við sjálfan sig.