Frú forseti. Um leið og ég fagna líka samstöðunni og vinnubrögðunum vil ég taka fram að ég styð þetta mál með fyrirvara. Ég styð málið í trausti þess að hér sé um að ræða fyrsta skrefið í aðgerðum til bjargar skuldsettum heimilum á Íslandi. Ég legg áherslu á að farið verði af festu í það að stíga næstu skref sem lúta að því að taka á himinháum höfuðstól íslenskra lána, koma fasteignamarkaðnum af stað aftur, búa til lánamarkað á Íslandi sem er heilbrigður og í anda þess sem gerist á Norðurlöndum, óverðtryggðan, heilbrigðan lánamarkað. Ég tek undir áhyggjur hv. þm. Þórs Saaris í þessum efnum.

Hér er um bráðaaðgerð að ræða. Ég styð hana. Hún kemur til hjálpar íslenskum heimilum en næstu skref þarf að taka. Ég bendi á tillögur Framsóknarflokksins í þeim efnum. Ég vona að væntanlegur starfshópur muni stíga næstu skref hratt og örugglega. Ég styð málið.

Frú forseti. Farið er í gríðarlega flóknar aðgerðir á miklum hraða við óvenjulegar aðstæður. Ég varð afskaplega glaður yfir því hversu mikil sátt var í nefndinni um málið. Í ljósi þess hve vanmáttug staða skuldara er gagnvart fjármálakerfinu í heild sinni lagði ég ríka áherslu á það í nefndinni að stofnaður yrði umboðsmaður skuldara. Þær áherslur náðu inn í verkefnalista starfshópsins sem skilar niðurstöðum í mars 2010 og er það vel þótt ég hefði kosið að tilvist umboðsmanns hefði verið tryggð í sjálfu frumvarpinu og þannig stigið fastar til jarðar í þágu skuldara.

Hæstv. forseti. Ég fagna því að við séum komin þetta langt, þ.e. að hafa náð að fara með málið í gegnum þingið með breiðri samstöðu. Ég tek undir með Þór Saari að það er ekki til fyrirmyndar að vinna mál með þessum hraða. Málið er hins vegar brýnt. Það sem er mikilsverðast er að sú tillaga sem uppi hefur verið hjá mörgum hverjum, m.a. hjá okkur sjálfstæðismönnum, að farið verði í þverpólitískt starf við að leysa skuldavanda heimilanna, er orðin að veruleika. Þess vegna hrósa ég öllum þeim sem komið hafa að málinu og þakka enn og aftur fyrir gott samstarf. Ég segi já.

Virðulegi forseti. Ég fagna því að nú skuli sjá fyrir endann á lagasetningunni þannig að heimilin megi búast við því að greiðslubyrði þeirra lækki um næstu mánaðamót. Hraðinn sem er á málinu endurspeglar það náttúrlega að verið er að reyna að koma aðgerðum í gegn út af þessum tímasetningum.

Ég vil hins vegar benda á að ég lít á þetta mál sem fyrsta skref. Þetta tekur á greiðsluvandanum, við eigum eftir að taka á skuldavanda heimilanna. Í framhaldinu býst ég við og á von á að farið verði að tillögum okkar sjálfstæðismanna, eins og hefur verið gert að mörgu leyti í þessu máli, og að næsta skref sé að taka á skuldavandanum.

Ég lýsi mig samþykkan málinu.