Frú forseti. Eðlilegt er að fagna þeirri miklu samstöðu sem hefur orðið um þetta frumvarp, ekki aðeins nú á þessu þingi, hjá hv. allsherjarnefnd þar sem fulltrúar allra þingflokka styðja það frumvarp sem hér liggur fyrir öðru sinni en frumvarpið var fyrst flutt af öllum nefndarmönnum í Þingvallanefnd á síðasta ári og endurflutt núna með sama hætti.

Um þjóðgarðinn á Þingvöllum gilda sérstök lög. Hann er friðlýstur helgistaður allra Íslendinga og á samkvæmt þeim lögum að vera svo um ókomna tíð. Það er sjálfsagt og eðlilegt þegar fram hefur komið ósk um að hv. allsherjarnefnd fjalli um málið milli umræðna að svo verði gert en ég vil vekja athygli á því að í Þingvallanefnd er til umræðu spurningin um áheyrnarfulltrúa, ekki aðeins frá Bláskógabyggð heldur ýmsum öðrum aðilum sem eiga hagsmuna að gæta í þjóðgarðinum.

Frú forseti. Þjóðgarðurinn á Þingvöllum er öllum dýrmætur. Hann er náttúrlega ekki friðlýstur helgistaður eins og hæstv. ráðherra sagði, hann er þjóðgarður og á Alþingi voru sett lög um þjóðgarðinn. Mér þykir harla einkennilegt, og tek undir með hv. 3. þm. Suðurkjördæmis, að Alþingi ætli að undanskilja þjóðgarðinn á Þingvöllum hvað varðar frístundabyggð og ég sit því hjá.

Frú forseti. Ég styð þá þverpólitísku niðurstöðu sem hefur náðst að þessu sinni um Þingvallaþjóðgarð en ég vil hins vegar vekja athygli þingheims á því að við ættum að sameina alla þjóðgarða á Íslandi, ekki hafa þrenns konar löggjöf um þá þjóðgarða sem við starfrækjum heldur samræma þá og hætta að vera með sérmeðferð fyrir Þingvelli og skilja þá í raun aðra þjóðgarða eftir.

Frú forseti. Alþingi setti afskaplega skynsamleg lög um frístundabyggð sem eiga að gilda alls staðar á landinu. Ég get ekki séð af hverju þau skynsamlegu lög eiga ekki að gilda á Þingvöllum eins og annars staðar og ég segi því nei.