Hæstv. forseti. Ég vil gera grein fyrir hjásetu minni og félaga minna í Sjálfstæðisflokknum. Hér er verið að bera undir atkvæði pakka af breytingartillögum og eru ýmsar þeirra til bóta. Sumar þeirra hefði ég reyndar kosið að væru á annan veg en í ljósi þess að það virðist vera meiri hluti fyrir þessu máli og þessum breytingartillögum munum við ekki leggjast gegn þeim og kjósum að horfa alla vega á það í breytingartillögunum sem til bóta horfir. Hins vegar eru þarna enn atriði sem við getum ekki fallist á þannig að við munum sitja hjá við þessa atkvæðagreiðslu en ég mun nánar gera grein fyrir afstöðu okkar til málsins þegar kemur að atkvæðagreiðslu um greinarnar svo breyttar.

Hæstv. forseti. Ég greiði atkvæði gegn þessari tillögu og raunar greiddum við sjálfstæðismenn atkvæði áðan gegn 2.–14. gr., svo breyttum. Við sýnum þar með þá afstöðu okkar að við teljum að málið hafi alls ekki verið komið í þann búning að fullnægjandi væri. Við gátum stutt breytingartillögurnar sem voru í rétta átt en málið er samt alls ekki í þeim búningi að það sé tilbúið eins og við gerðum grein fyrir í umræðum hér fyrr í kvöld og því getum við ekki fallist á að það verði afgreitt lengra að svo stöddu.