um fundarstjórn.
fundur þingflokksformanna.
fundur þingflokksformanna.
Forseti. Mér heyrðist áðan sem sá forseti sem þá sat og kjörinn var til síns embættis hefði boðað fund með þingflokksformönnum klukkan fjögur. Ég hef áhuga á að vita hvort sá fundur hefur farið fram eða hvort hann stendur enn. Hvernig stendur á því að þingmenn, þótt þingflokksformenn og forsetar séu, eru teknir á sérstaka fundi á vinnutíma Alþingis? Um hvað snýst þessi fundur? Mér heyrðist forseti segja að hann boðaði til fundarins um „þetta mál“ þegar hann tilkynnti um fundinn. Þá var verið að ræða ýmis mál tengd hæstv. fjármálaráðherra Steingrími J. Sigfússyni og meintum ummælum hans um Urriðafossvirkjun og Flóahrepp.
Ég óska ósköp einfaldlega eftir upplýsingum um það hvaða mál tefja þingflokksformenn og forseta frá því að vera hér á fundi og hlýða á þær umræður sem hér fara fram.
Forseti getur upplýst að fundi þeim sem hv. þingmaður spurði eftir mun hafa lokið í þessu.
Þá er tekið fyrir 2. dagskrármálið, Stofnun þjóðhagsstofnunar. Það er mál nr. 430 á þskj. 703 og tekur nú forseti það fyrir öðru sinni. Til máls tekur hv. fyrirspyrjandi sem er 11. þm. Reykv. n. Mörður Árnason. (MÁ: Fundarstjórn forseta.) Þegar þessum dagskrárlið er lokið, hv. þingmaður. Nú hefur þetta dagskrármál verið tekið fyrir, 2. dagskrármálið, og hv. fyrirspyrjandi tekur nú til máls. (MÁ: Forseti. Það er gert ráð fyrir því í þingsköpum sem ég vil …)
Má ég bjóða þingmanninum að ganga til pontu? (MÁ: … að þingmaður geti hvenær sem er beðið um orðið …) Forseti ætlar ekki að fara hér í umræðu við hv. þingmann en þegar búið er að taka fyrir tiltekið dagskrármál öðru sinni og hv. þingmaður hafði kvatt sér hljóðs til þess að ræða um fundarstjórn forseta, enginn hafði tekið til máls þess í milli, er 2. dagskrármálið nú á dagskrár og ég býð hv. þingmanni að ganga til pontu og flytja fyrirspurn þá sem hér er á dagskrá á þskj. 703. (MÁ: Ég þakka forseta fyrir það boð og hlýt að hlíta úrskurði forseta um þetta efni. Hann er sá eini sem getur kveðið upp slíkan úrskurð.)