Frú forseti. Rétt áðan ræddum við nefndarálit um frumvarp til laga um breytingu á vatnalögum og ég óskaði eftir því að þeir sem skrifa undir nefndarálitið væru við umræðuna af því að ég ætlaði að bera fram nokkrar spurningar sem ég og gerði. Ég varð ekki var við að neinn svaraði þessum spurningum, frú forseti.

Þetta er mjög stór lagabálkur og þó að það sé almenn sátt um hann finnst mér engu að síður að menn þurfi að ræða einstakar greinar og einstök atriði í frumvarpinu. Ef ekki er meiningin að ræða hlutina breytist skilningur minn á Alþingi ansi mikið. Ég sakna þess að hafa ekki heyrt svör við spurningum mínum og geri þess vegna athugasemd við stjórn fundarins.