Hæstv. forseti. Ég skildi ekki alveg síðustu setninguna í ræðu hv. formanns umhverfis- og samgöngunefndar.

Ég lít svo á að við séum að vinna hér að ákveðnu verkefni, breytingum og hagræðingu á þessu sviði. Við fulltrúar minni hlutans í umhverfis- og samgöngunefnd lögðumst gegn frumvarpinu í 2. umr., bæði þessu og frumvarpinu um Vegagerðina sem er hér líka á dagskrá, á þeirri forsendu að við töldum að hugmyndir um hagræðingu og sparnað sem frumvörpin byggja á væru ekki nægilega rökstuddar og traustar.

Ég fagna því að við fáum tækifæri til að fjalla aftur um málin tvö sem fylgjast að í nefnd milli umræðna. Í ljósi þess að við treystum því að við fáum frekari upplýsingar og jafnvel að einhverjar breytingar verði á málunum á því stigi mun ég og að ég hygg flokksfélagar mínir sitja hjá við þessa atkvæðagreiðslu. Við drögum jafnframt til baka (Forseti hringir.) frávísunartillögu okkar til 3. umr.

Herra forseti. Ég er sammála þeirri meginhugsun og meginmarkmiðum um hagræðingu og sameiningu stofnana sem felst í þeim frumvörpum sem hér liggja fyrir en er þó ekki sannfærður um þá leið sem valin var. Einkum tel ég óheppilegt að ekki hafi verið unnið að málinu í samræmi við tillögu nefndar samgönguráðherra sem gerði ráð fyrir umfangsmeiri breytingum með sérstakri stofnun hafs og stranda en í því felst að Siglingastofnun, Landhelgisgæsla og Fiskistofa verði sameinaðar ásamt verkefnum Umhverfisstofnunar varðandi mengun hafs og stranda, ferjurekstri Vegagerðar, skiparekstri Hafrannsóknastofnunar og rekstri Vaktstöðvar siglinga. Þar með væri horft til hafsins alls frá sjónarhorni umhverfis- og náttúruverndar, lífríkis, siglingaöryggis o.s.frv.

Í ljósi yfirlýsinga formanns umhverfis- og samgöngunefndar um að málið verði skoðað milli umræðna kýs ég að sitja hjá við afgreiðslu þessara mála að sinni og bíð niðurstöðu nefndarinnar milli umræðna.

Virðulegi forseti. Ég stend vörð um Siglingastofnun vegna þess að við búum á eyju þar sem siglingar og flug eru helstu samgöngur við umheiminn. Vegakerfið er tenging innan lands þar sem við erum rétt rúmlega 300 þúsund íbúar, allt annað umhverfi okkar í flutningum er háð siglingum og flugi.

Næstu verkefni verða norðurslóðasiglingar. Það er mjög stór málaflokkur sem huga verður að. Ég tel að þessir málaflokkar séu ekki á réttum stað hjá Vegagerðinni þar sem Vegagerðin fæst nánast eingöngu við vega- og gangagerð. Lagt er til að því verði breytt í þessum frumvörpum.

Ég bað um að bæði þessi mál sem eru til afgreiðslu hér í dag færu í umhverfis- og samgöngunefnd á milli umræðna. Ég ætlaði að vera á móti frumvörpunum en vegna þess að orðið var við þeirri ósk að nefndin tæki þau aftur til umræðu og fengi til sín gesti (Forseti hringir.) ætla ég að sitja hjá að sinni en lofa engu með framhaldið.