Hæstv. forseti. Með frumvarpinu eru lagðar til breytingar á almennum hegningarlögum í því skyni að innleiða í íslenskan rétt ákvæði samnings Evrópuráðsins um vernd barna gegn kynferðislegri misneytingu og kynferðislegri misnotkun.

Hinn 15. mars síðastliðinn samþykkti þingið tillögu til þingsályktunar um fullgildingu samningsins. Þetta er mikilvægt skref sem við erum að stíga núna og helstu atriðin í frumvarpinu eru að fyrningarfrestur brota er lúta að vændi barna og þátttöku barna í nektarsýningum og mansalsbrota gegn börnum hefjist ekki fyrr en við 18 ára aldur, að refsivert verði að mæla sér mót við barn með samskiptum um netið eða annarri upplýsinga- og fjarskiptatækni eða með öðrum hætti, og bætt er við lögin sérstöku ákvæði um barnaklám.

Einnig eru gerðar breytingar á barnaverndarlögum þar sem er komið sérstakt refsiákvæði í almenn hegningarlög varðandi þátttöku barna í nektarsýningum og öðrum sýningum af kynferðislegum toga.