Herra forseti. Ég er ekki í hv. velferðarnefnd sem hv. þingmaður veitir forstöðu, en mig langar til að spyrja hvað mönnum finnst um svona lagasetningu þar sem ítrekað er frestað framgangi mála sem eiga að fara fram. Ég nefni greiðsluþátttökukerfi lyfja, ég gæti nefnt ótal mörg önnur mál. Það má vel vera að góðar ástæður séu fyrir þessu en þær hefðu átt að liggja fyrir þegar frumvarpið var samið og samþykkt. Ég hefði talið betra að menn færu hægar í sakirnar og gerðu raunhæfar áætlanir í stað þess að koma trekk í trekk og kollvarpa í raun öllum áætlunum sem einstaklingar hafa gert á grundvelli þessara laga.

Herra forseti. Þetta er hárrétt athugasemd hjá hv. þingmanni. Þegar Alþingi setur lög eru það lög og framkvæmdarvaldinu ber að vinna í samræmi við þau. Þetta frumvarp var tvívegis lagt fyrir þingið og unnið mjög ítarlega og vel af hálfu þáverandi félags- og tryggingamálanefndar en á lokasprettinum í þeirri vinnu kom fram mikil andstaða frá sveitarfélögunum við þetta ákvæði; það væri gefinn of skammur tími í gildistöku. Við afgreiðslu frumvarpsins frestuðum við því gildistökunni. Það var ekki gert með sérstöku frumvarpi heldur breytingartillögu við fyrirliggjandi frumvarp. Gildistökunni var frestað til 1. janúar 2013 til að gefa aðilum máls tækifæri til að fara betur yfir efnisatriði og framkvæmdina.

Það voru mikil vonbrigði þegar í ljós kom að vinnan var ekki talin nógu langt á veg komin til að yfirfærslan gæti átt sér stað um næstu áramót og virðist vera einhver kergja milli aðila um það hvernig eigi að standa að þessu. Nefndin kallaði til sín alla þá sem að málinu koma, jafnt sveitarfélög, Barnaverndarstofu sem og ráðuneytið. Niðurstaða okkar var sú að samþykkja málið eftir að hafa spurt þau sem eru í stýrihópnum sem á að hafa yfirumsjón með yfirfærslunni hvort aðilar máls teldu raunhæft að halda áfram. Þau töldu það, töldu sig geta náð lendingu í málið sem væri farsæl og voru sammála því að frumvarpið yrði samþykkt óbreytt og það varð niðurstaðan.

Herra forseti. Það er mjög slæmt að heyra að einhver kergja sé í framkvæmdarvaldinu við framkvæmd laga sem valdi því að ekki sé hægt að fara að lögum settum á Alþingi.

Ég held að menn ættu að temja sér meiri virðingu fyrir lögum. Ef sett eru lög á Alþingi eftir að heyrt skoðanir þeirra aðila sem eiga að framkvæma þau og farið hefur verið að ábendingum þeirra á það náttúrlega að vera svo, þá eiga lögin að vera framkvæmd.

Það er hárrétt, en ég ætla ekki að fjölyrða um þessa kergju, ég held að hún sé meðal annars komin til af því sem fram kom í fyrra nefndaráliti þegar lögin voru samþykkt sem og nefndaráliti núna við þetta frumvarp sem er með breytingartillögu við gildistökuákvæðið. Það þarf að fara mjög vel yfir það hvort nægir fjármunir séu í þessum málaflokki. Það er vandamálið. Án þess að það liggi alveg ljóst fyrir eru líkur á því að yfirfærslan kunni að þýða að þjónusta við ákveðinn hóp barna skáni á kostnað annarra barna. Við viljum tryggja að öll börn fái góða þjónustu og að þau njóti jafnræðis hvar sem þau búa á landinu og að þjónusta við ákveðinn hóp barna verði ekki skert á kostnað annarra.

Forseti vill minna þingmenn á að ávarpa og beina orðum sínum til forseta.