Virðulegi forseti. Við greiðum hér atkvæði um frumvarp til laga um Orkuveitu Reykjavíkur. Núna þegar stefnir í að þessi uppskipting Orkuveitunnar verði lögfest vildi ég rétt koma í atkvæðaskýringu og þakka hv. atvinnuveganefnd fyrir góða vinnu að þessu máli.

Menn þekkja forsöguna, þessu hefur áður verið frestað í fjórgang en nú hefur þessi skipting verið lögfest og er þá jafnræði meðal allra orkufyrirtækja sem starfa hér á markaði. Þetta frumvarp hefur verið unnið í góðu samstarfi og góðri samvinnu við fyrirtækið. Ég get fullvissað menn um að stjórnendur fyrirtækisins eru í góðri sátt við þetta og þetta mun ekki hafa neikvæð áhrif á fjárhagsstöðuna.

Ég ítreka þakkir mínar til nefndarinnar fyrir góða vinnu að þessu máli.

Virðulegi forseti. Ég vil nota tækifærið og þakka sömuleiðis hv. atvinnuveganefnd fyrir góð störf. Í meðförum þingsins hefur málið tekið góðum breytingum. Núna ætti að vera tryggt að Orkuveita Reykjavíkur einbeitir sér að því sem Orkuveita Reykjavíkur er góð í, kjarnastarfseminni. Á þinginu varð slys á sínum tíma við lagasetningu um þetta ágæta fyrirtæki þegar Orkuveitan fór í ýmislegt annað sem kostaði landsmenn alla, í það minnsta alla þá sem njóta þjónustu hennar og eigendur hennar, mikla fjármuni. Ég tók það upp í umræðum og hv. atvinnuveganefnd tók mið af því.

Ég fagna þessum breytingum og þessari niðurstöðu.