Herra forseti. Það er kunnara en frá þurfi að segja að hingað til lands hefur orðið mikil fjölgun ferðamanna á undanförnum árum. Er staðan orðin sú að ferðaþjónustan er ein af okkar grundvallaratvinnugreinum og tekjur af henni fara sívaxandi. Með aukningu og fjölgun ferðamanna er líka meiri ásókn og ágengni á fjölsótta ferðamannastaði.
Þess vegna hefur verið mikil umræða um uppbyggingu innviða ferðaþjónustunnar til að mæta þessari fjölgun ferðamanna. Mikið hefur verið rætt um það og mörg sjónarmið verið uppi. Iðnaðarráðherra hefur til dæmis rætt um ýmis form af gjaldtöku á ferðamannastaði. Umhverfisráðherra ræddi í fyrirspurnatíma fyrir skemmstu um mikilvægi almannaréttarins í íslenskri löggjöf, það að Íslendingar geti farið um eigið land og nú síðast blandast fjármálaráðherra inn í þetta mál með umræðu um það hvort taka eigi virðisaukaskatt af aðgöngumiðum sem seldir eru að Geysi. Þetta mál snertir bersýnilega fleiri ráðuneyti og þess vegna hef ég kosið að beina fyrirspurn minni til hæstv. forsætisráðherra.
Hér hafa verið uppi hugmyndir um að taka upp einhvers konar náttúrupassa, það hafa verið hugmyndir um gistináttagjald og brottfarargjald. Mig langar að spyrja hæstv. forsætisráðherra hvort þetta mál hafi í heild sinni verið til umræðu á vettvangi ríkisstjórnarinnar og hvort ríkisstjórn hans hafi mótað sér einhverja stefnu og hver hún þá sé í þessu máli. Ég óttast að ef við förum ekki að grípa til einhverra ráðstafana og setja einhvern ramma um þetta mál missum við tökin á því og það tel ég að væri skaðlegt fyrir okkur öll.
Mig langar að heyra viðhorf hæstv. forsætisráðherra til þess hvort málið sé á borðum ríkisstjórnarinnar, hvað þar sé verið að ræða og hvort einhverrar augljósrar stefnu sé að vænta í málinu.
Virðulegi forseti. Ég deili þeim áhyggjum sem hv. þingmaður lýsti og tel mikilvægt að grípa til ráðstafana og koma þessum málum í fast form áður en menn missa þau úr böndunum og þetta verður enn flóknara viðureignar en það er.
Hvað varðar spurninguna um hvort þessi mál hafi verið til umræðu á vettvangi ríkisstjórnarinnar, já, menn hafa rætt þau þar. Málið er þó, eins og hv. þingmaður veit, á forræði hæstv. iðnaðarráðherra og ráðherrann hefur gert grein fyrir þeirri vinnu sem þar stendur yfir. Ég hef fulla trú á því að ráðherrann muni leiða það til lykta á þann hátt að gjaldtöku verði háttað þannig að hún muni nýtast fyrst og fremst til að byggja upp ferðaþjónustu, þ.e. að gera aðgengi að ferðamannastöðum betra og öruggara, og verði til þess fallið að aðstoða okkur við að taka á móti sífellt vaxandi fjölda ferðamanna.
Ég tel að það ástand sem nú sést glitta í með gjaldtöku hér og þar með ólíkum leiðum sé ekki viðunandi.
Herra forseti. Ég þakka hæstv. forsætisráðherra fyrir skýr svör. Ég fagna því sem hann segir, bæði fagna ég því sérstaklega að hann sé sammála mér um matið á stöðunni en ég fagna því líka að hann segir að núverandi ástand sé óviðunandi og þess vegna sé brýnt að taka á því. Ég er sammála því.
Hins vegar hafa verið ýmsar hugmyndir í gangi og það er líka rétt að málið í heild sinni er á forræði hæstv. iðnaðarráðherra en ég mundi vilja hvetja hæstv. forsætisráðherra til að slá aðeins í klárinn hvað þessa vinnu áhrærir. Hér er um að ræða mál sem þarf að nást breið sátt og samstaða um í landinu öllu. Það þarf líka að tryggja rétt Íslendinga til að fara um eigið land þannig að ég hvet hæstv. forsætisráðherra til að íhuga það með öðrum ráðherrum í ríkisstjórninni hvort ekki væri ástæða til að efna til þverpólitísks samráðs og samstarfs um leiðir (Forseti hringir.) sem við öll gætum fellt okkur vel við og þjóðin í heild sinni.
Virðulegur forseti. Ég tek hvatningu hv. þingmanns vel. Ég er líka sammála honum um mikilvægi þess að tryggja rétt Íslendinga til að fara um eigið land, þennan almannarétt sem hann gat um. Ég veit að mikil vinna hefur verið lögð í þetta mál í atvinnuvegaráðuneytinu að undanförnu og ráðherrann hefur haft prýðisgóða forustu um að keyra þetta mál áfram.
Það er líka rétt sem hv. þingmaður getur um, að eðli málsins er slíkt að það fer vel á því að þegar allar upplýsingar liggja fyrir, möguleikar og tækifæri, eigi sér stað um það sem mest pólitískt samráð og samstarf.