Hæstv. forseti. Mjög góður andi hefur ríkt um vinnuna í sambandi við þetta frumvarp en þó er það þannig að á lokametrunum er ágreiningur um tvö atriði og þar flytjum við breytingartillögu. Það er annars vegar um það að málsmeðferð í málum hælisleitenda skuli fyrst og fremst vera munnleg, þó með heimild til að vera skrifleg en ekki öfugt. Þetta er áherslumunur sem við höfum en við óskum eftir að sú tillaga verði flutt á undan vegna þess að við munum styðja það ákvæði að þessari tillögu felldri ef það verður vilji þingsins.

20. gr. fjallar um örugg upprunaríki og við gerum tillögu um að sú tillaga falli út og treystum okkur ekki til að mæla með þeirri grein sérstaklega. Að öðru leyti munum við styðja lögin vegna þess að kærunefnd í útlendingamálum og annað slíkt, sem hér er í þessum lögum, er mjög til bóta og unnin hefur verið vönduð vinna í hv. allsherjar- og menntamálanefnd í sambandi við þetta mál.

Virðulegur forseti. Hér greiðum við atkvæði um breytingartillögu minni hlutans um það að málsmeðferð skuli að jafnaði vera munnleg í málefnum sem þessum. Þessi tillaga er fram komin vegna eindreginna óska þeirra sem best þekkja til í þessum geira. Það er ástæðan fyrir því að þessi tillaga kemur hér fram. Ég segi já.

Virðulegi forseti. Hér greiðum við atkvæði um það að í upphaflega frumvarpinu er gert ráð fyrir að Útlendingastofnun geti stuðst við lista yfir örugg þriðju ríki. Útlendingastofnun haldi með skipulegum hætti utan um slíkan lista. Minni hluti allsherjarnefndar telur ekki verjandi að halda uppi slíkum lista þar sem minni hlutinn telur hættu á því að sá listi verði til þess að menn stytti sér leið þegar um er að ræða mjög vandasamar ákvarðanir sem varða einstaklinga í vanda. Því gerum við ráð fyrir því að þessi listi verði ekki hluti af þessum lögum.