Virðulegur forseti. Hér er um að ræða þarfa og góða skýrslubeiðni af hálfu þingmanns en það verður ekki sömu hrósyrðum lokið á atkvæðagreiðsluna sem er nú reynt að efna til í þriðja sinn. Ég vil segja að það er ekki alveg vansalaust fyrir Alþingi að það þurfi þrisvar sinnum að kalla saman í atkvæðagreiðslu um þetta mál og að tvívegis á einum þingdegi sé ekki hægt að ná í þingsalinn nægilegum fjölda þingmanna til þess að viðhafa atkvæðagreiðslu. Ég held að það sé full ástæða til þess fyrir forsætisnefnd þingsins að ræða þá stöðu og reyna að tryggja að svona uppákomur verði ekki á þinghaldinu oftar.

Forseti er út af fyrir sig sammála því að það er auðvitað ekki eins og vera ber þegar ekki tekst að efna til atkvæðagreiðslu eins og áformað er.

Það er lítil huggun harmi gegn að vita það þó að þetta er ekki einsdæmi í sögu þingsins. Forseta rekur minni til þess að slíkt gerðist bæði oft á síðasta kjörtímabili og fyrr.

Virðulegi forseti. Þetta er fín tillaga og ég kem til með að styðja hana, en ég vildi vekja athygli á því að allir flutningsmenn tillögunnar eru konur. Mér finnst alveg þess virði að nefna þetta vegna þess að jafnrétti kynjanna er ekki bara málefni kvenna heldur málefni okkar allra, sem við eigum öll að taka þátt í. Mér finnst mikilvægt að það sé ekki bara þannig að karlmenn taki þátt í því að styrkja jafnrétti kynjanna, mér finnst líka mikilvægt að það líti þannig út vegna þess að ef það lítur ekki þannig út getum við ekki mælt það.

Að því sögðu aðhyllist ég þessa tillögu og kem til með að styðja hana.