Herra forseti. Við stöndum ekki að afgreiðslu þessa máls. Það tengist annars vegar ótímabærri, að okkar mati, tekjufærslu ríkisins á þessum innbyrðis samskiptum við Seðlabankann sem eðlilegra hefði verið að kæmi til sögunnar á næsta ári eftir því sem tilefni væru þá til að afloknu því að Seðlabankanum hefðu verið sett ný eiginfjárviðmið, að uppgjör hans á þessu ári hefði legið fyrir og endanleg staða. Ríkið er hér að flýta sér um of að okkar dómi til að koma þessari umdeilanlegu tekjufærslu inn í bækur sínar strax á árinu 2014.

Í öðru lagi er það svo þannig að ýmislegt sem varðar þessi vandasömu samskipti milli ríkissjóðs og Seðlabankans og færslur í þeim efnum hefði gjarnan mátt undirbyggja betur með vandaðri vinnu að okkar dómi þó að aðkoma ríkisreikningsnefndar á síðustu stigum málsins hafi vissulega skýrt það nokkuð. Það er fljótaskrift á þessu af hálfu hæstv. fjármálaráðherra og það vekur auðvitað grunsemdir um að (Forseti hringir.) það hafi haft óþarflega mikið að segja í þessu máli, löngunin til að ná í þessa tekjufærslu strax á árinu 2014.