Virðulegi forseti. Af því að hér er mikið rætt um Evrópusambandið þá vil ég bara biðja menn að hugsa til þess hver stýrir Evrópusambandinu. Nú er það þannig að í hverju einasta aðildarlandi er það upplifun almennings og þjóðkjörinna fulltrúa að þeir stýri engu, afskaplega litlu. Nú er það reyndar ekki þannig að þingmenn viðkomandi landa semji þær reglugerðir því að vandinn og stærsta ástæðan fyrir lýðræðishallanum er sú að þetta er embættismannabandalag sem erfitt er að sjá hver stýrir. Hæstv. utanríkisráðherra fór hér sérstaklega yfir það að sem betur fer er afskaplega lítið sem við þurfum að renna í gegnum þingið í samanburði við þau lönd sem eru í þeirri stöðu að vera föst í þessu tollabandalagi. Ég held að það sé rétt, virðulegi forseti, af því að sumir eru alltaf að tala með öðrum hætti hér inni, að sú rödd fái að heyrast. Ég hvet menn til að kynna sé umræður um Evrópusambandið í þeim löndum sem eru í Evrópusambandinu. (ÖS: Heill þér, varaforseti.)

Virðulegur aðalforseti, þá væntanlega. Mig langar aftur að koma hér inn á það sem hv. þingmaður nefndi varðandi Evrópusambandið. Auðvitað er Evrópusambandið táknmynd og er í raun bara skrifræðisbákn, algert. Á þessum 20 árum EES-samningsins er búið að samþykkja rúmlega 117.000 gerðir innan Evrópusambandsins og af þeim hafa um það bil 8.500 verið innleiddar á Íslandi. Þannig að það hefði munað fyrir okkur ef við værum þarna inni og hefðum þurft að innleiða þetta allt saman og berjast við það. Ef ég man rétt þá er rúmlega helmingur, líklega í kringum 70%, allra fyrirtækja innan Evrópusambandsins, mjög óánægð með það regluverk sem þeim er búið þar. Það hefur gengið svo langt að það er sérstakur kommisar innan Evrópusambandsins sem á að reyna að vinda ofan af þessu rugli öllu saman sem búið er að samþykkja. Þannig að ég þakka bara guði fyrir að þetta ferli er komið á leiðarenda.