um fundarstjórn.
mælendaskrá í störfum þingsins.
mælendaskrá í störfum þingsins.
Virðulegi forseti. Í gærkvöldi sendi ég hæstv. forseta og ritara forsetaskrifstofu bréf þar sem ég óskaði eftir að fá að komast að undir liðnum störf þingsins til að gera leiðréttingu á upplýsingum sem ég gaf í ræðu hér í gær. Ég komst ekki á mælendaskrá og hef ekki fengið að leiðrétta ummæli mín fyrr en nú en það hefur hins vegar þingmaðurinn Ásmundur Friðriksson fengið að gera í minn stað af einhverjum ástæðum. Hafi hann þakkir fyrir það sæmilega litlar.
Í ummælum sem ég lét falla hér í gær um fjölda banaslysa í Reynisfjöru byggði ég á upplýsingum í fjölmiðlum um að þar hefðu orðið sex banaslys á síðustu árum. Það er ekki rétt. Nú hafa þessar fréttir verið uppfærðar og það er talað um nokkur banaslys en ekki tiltekna tölu. Ég hef ekki komist aftar en til 2007. Frá þeim tíma hafa tvö banaslys orðið við Reynisfjöru en að minnsta kosti níu manns hafa komist þar í bráða lífshættu. Þessar tölulegu upplýsingar breyta í raun og veru engu um efni míns máls en rétt skal vera rétt og mér er ljúft og skylt (Forseti hringir.) að leiðrétta þetta hér. Ég sá hins vegar ekki alveg ástæðu fyrir aðra þingmenn, þingmenn stjórnarflokkanna, til að gera það í minn stað þegar forseti vissi fullvel að ég hafði óskað eftir því að koma strax á mælendaskrá til að leiðrétta þessi ummæli.
Forseti vill af þessu gefnu tilefni segja að forseta barst í morgun ósk frá hv. þingmanni um að taka til máls um fundarstjórn forseta að loknum umræðum um störf þingsins. Forseta var auðvitað ekki kunnugt um efni þeirra ræðna sem voru fluttar undir dagskrárliðnum störf þingsins fyrr en þær höfðu verið fluttar.
Virðulegi forseti. Ég vil bara koma að tveimur örstuttum tillögum. Önnur er sú að dagskrárliðurinn störf þingsins verði lengdur um að minnsta kosti korter. Að mínu mati væri fínt að lengja hann um hálftíma til að fólk geti komist að og sagt það sem það þarf að segja. Hvað varðar liðinn fundarstjórn forseta er hann, eins og þingmenn vita, einnig notaður til að bera af sér sakir og það kemur fyrir að í störfum þingsins segir einn hv. þingmaður eitthvað um ummæli einhvers annars hv. þingmanns sem sá hv. þingmaður getur viljað eiga kost á að leiðrétta strax eða í það minnsta koma einhverju áleiðis. Því þætti mér eðlilegra ef það væri heimilt að óska eftir innleggi um fundarstjórn forseta á milli ræðna í störfum þingsins.
Að því sögðu held ég að vandinn væri leystur með því einfaldlega að lengja dagskrárliðinn.
Virðulegi forseti. Ég verð bara að leiðrétta ummæli hæstv. forseta. Ég óskaði ekki eftir því að taka til máls um fundarstjórn forseta til að leiðrétta þessi ummæli. Ég óskaði eftir því við ritara forsetaskrifstofu strax í gær að fá að leiðrétta þau. Ég fékk ekki svar og bað þar af leiðandi um orðið undir liðnum störf þingsins í morgun og lét fylgja þau skilaboð að það væri vegna leiðréttingar sem ég vildi koma á framfæri.
Mér var hins vegar sagt að ég yrði að biðja um orðið um fundarstjórn forseta ef ég ætlaði að koma þessari leiðréttingu á framfæri þannig að það var annar þingmaður sem slapp í ræðustól undir liðnum um störf þingsins til að koma henni á framfæri í minn stað. Og það harma ég, mér fannst það ekki viðeigandi.
Forseti ætlar svo sem ekki að vera með mikil orðaskipti út af þessu að öðru leyti en því að honum bárust þessi boð sem forseti vitnaði til hér áðan og fer með rétt mál í þeim efnum.