Í tilefni þessarar atkvæðagreiðslu finnst mér mikilvægt að lýsa skilningi mínum á málinu. Mér finnst þetta ekki þægilegt frumvarp og að setja svona sérákvæði af einhverju tilefni sem blasir við, það er mikið af umsóknum frá tilteknum löndum um hæli eða vernd hér á landi. Mér finnst mjög mikilvægt að þegar kemur til þess að nýta þetta ákvæði, sem verður væntanlega lögfest núna til bráðabirgða, til að vísa fólki aftur til síns heima, sé það aðeins gert ef það er algerlega augljóst að um tilhæfulausa umsókn um vernd er að ræða. Ef það kann að vera einhver ástæða fyrir því að viðkomandi sé að sækja um vernd sé hann ekki sendur heim. Að þessu spurði ég í nefndarvinnunni og ég fékk staðfestingu á að það væri skilningurinn. Hins vegar er það auðvitað lykilatriði að kæruferlið heldur áfram hér á landi. Það er ekki verið að taka af þessu fólki þann rétt að leita réttar síns þó að það sé sent aftur til síns heima. Ég vildi bara að það væri alveg skýrt.

Hæstv. forseti. Ég vil bara taka það fram að við erum ekki að gera breytingar á því ákvæði er fjallar um örugg ríki. Þetta ákvæði gildir einungis til áramóta þegar nýju útlendingalögin taka gildi. Hér er verið að stíga eins lítið skref og í rauninni er hægt. Engu að síður er það mjög mikilvægt og ég þakka fyrir þann skilning sem málið fær hér í þinginu. Við fjölluðum að sjálfsögðu um efnisatriði ákvæðis á þessa lund þegar við fórum með hinn svokallaða útlendingastubb í gegnum þingið fyrr á þessu þingi, í marsmánuði minnir mig þannig að rökin með og á móti hafa verið rædd í allsherjarnefnd og við höfum fengið gesti vegna þess þó að við höfum ekki náð að taka slíka fundi í nefndinni núna í þessum mánuði.