raforkukostnaður garðyrkjubænda.
Hæstv. forseti. Einn af þeim þáttum sem hefur veruleg áhrif á afkomu garðyrkjunnar er hátt raforkuverð sem garðyrkjubændur verða að greiða. Ég fór á fund garðyrkjubænda nýlega og þar kom einnig fram að endurnýjun í stéttinni er sáralítil, fyrst og fremst vegna hás fjárfestingarkostnaðar og stopullar afkomu vegna þessa háa raforkuverðs. Við flytjum inn ríflega 25 þús. tonn af grænmeti samkvæmt tölum frá 2015 og ræktum um 15 þús. tonn sjálf þannig að þarna eru greinilega sóknarfæri.
Þetta mál er alls ekki nýtt af nálinni og oft hefur verið fjallað um það í þessum sal. Hv. þm. Sigurður Ingi Jóhannsson lagði til að mynda fram þingsályktunartillögu ásamt fleiri þingmönnum Framsóknarflokksins á 138. þingi sem var samþykkt. Með henni ákvað Alþingi að fela iðnaðarráðherra að kanna leiðir til að lækka rafmagnskostnað garðyrkjubænda, sérstaklega dreifingarkostnað. Tillagan fór frá ráðherra til nefndar, en síðan hefur ekkert til hennar spurst og ekkert komið frá ráðuneytinu um þetta mál samkvæmt þeim gögnum sem ég hef undir höndum.
Aftur var fjallað um málið á 144. þingi í munnlegri fyrirspurn til ráðherra, Ragnheiðar Elínar Árnadóttur. Í svari sínu segir ráðherra, með leyfi forseta:
„Frá því ég tók við núverandi embætti höfum við í ráðuneytinu átt þó nokkra fundi, ýmist ég sjálf eða mínir starfsmenn, með fulltrúum garðyrkjubænda og verið í góðu samstarfi við þá. Þar hefur verið farið yfir þróun raforkuverðs til garðyrkjubænda, stöðu þeirra í samanburði við aðra raforkunotendur í landinu og hugmyndir sem þeir hafa lagt fram um breytingar á gjaldskrá vegna sölu á raforku til þeirra. Þessi vinna er enn þá í gangi en niðurstöður liggja ekki fyrir að svo stöddu, enda eru til fleiri en ein aðferð við að koma til móts við þessi sjónarmið.“
Þetta var árið 2014. Í framhaldi af þessu vil ég því spyrja hæstv. iðnaðarráðherra:
1. Hvar er þessi vinna stödd í ráðuneytinu?
2. Hvaða sýn hefur ráðherra á málið, hyggst hún beita sér fyrir lækkun raforkuverðs til bænda?
3. Kæmi til greina að breyta raforkulögum, ef þau eru fyrirstaðan, svo hægt sé að gera nauðsynlegar breytingar á gjaldskrá og tryggja þannig afkomu garðyrkjunnar?
Frú forseti. Ég þakka hv. þingmanni fyrir þessa fyrirspurn. Fyrst vil ég nefna að raforkuverð til garðyrkjubænda er mjög verulega niðurgreitt. Raforkumarkaðurinn er samkeppnismarkaður, en garðyrkjubændur búa við önnur lögmál. Ég vil taka undir með hv. þingmanni og segja að mikil tækifæri eru í landbúnaði og matvælaframleiðslu. Ég er að sjálfsögðu reiðubúin að gera það sem ég get í mínu ráðuneyti til að liðka fyrir enn frekari matvælaframleiðslu hér á landi. Ég er viss um að við eigum mikið inni þar. Það er vel.
Ég veit ekki til þess að það sé vinna í gangi í ráðuneytinu til þess að lækka þetta verð enn frekar, en ég hef vissulega ekki fengið kynningu á öllum hópum eða öllum nefndum í ráðuneytinu enn þá. Ég á sjálf eftir að funda með þeim aðilum sem hv. þingmaður nefndi og reifaði, þannig að þeir munu þá að sjálfsögðu koma sínum sjónarmiðum á framfæri og ég get spurt enn frekar. Vonandi er hægt að gera eitthvað gott. En ég ætla samt ekki að standa hér og lofa því að það verði einhver meiri háttar stefnubreyting. Ég er einfaldlega ekki í stöðu til þess sem stendur en ítreka þetta með tækifærin í landbúnaði og matvælaframleiðslu og þá sérstaklega er varðar garðyrkjubændur.
Hæstv. forseti. Ég vil byrja á því að þakka hæstv. ráðherra fyrir gott svar og sérstaklega að finna að hún hefur áhuga á þessu máli. Ég bind því miklar vonir við það að hún beiti sér í því og finni leiðir, vegna þess eins og ég sagði í ræðu minni áðan, að málið hefur verið til umfjöllunar hjá nokkrum ráðherrum nú þegar.
Mér finnst mjög skrýtið þegar ég hitti garðyrkjubændur að þeir segja alltaf það sama: Það er vilji hjá ráðherranum, það er einlægur vilji til að breyta. Og ég spyr: Af hverju er ekki búið að breyta þessu? Ja, þetta bara er hjá Rarik í einhverju excel-skjali og það er ekki vilji til að breyta. Nú erum við með nýjan ráðherra, öflugan ráðherra. Ég vona að hún beiti sér af heilum hug í þessu máli.
Nú eru niðurgreiðslur talsverðar til garðyrkjubænda vegna raforku. Þetta snýst um það að garðyrkjubændur vilja fá sérstakan taxta. Þeir greiða núna fyrir raforku samkvæmt heimilistaxta sem er mjög óeðlilegt miðað við þá framleiðslu sem þeir vinna við.
Ég ætla að þakka brýninguna og ítreka það sem ég sagði. Auðvitað verður maður að hafa í huga að niðurgreiðslan er mjög veruleg. En ég mun ekki standa í vegi fyrir því ef eitthvað er hægt að gera. Vonandi er þá annaðhvort hægt að ljúka vinnunni eða alla vega taka ákvörðun. Það er fátt meira þreytandi fyrir einstaklinga sem eru að reyna að spreyta sig í verðmætasköpun að einhverjar hindranir séu fastar í nefnd. Þá er stundum betra að fá svar. Ég mun taka þetta til skoðunar og hef á þessu áhuga og vona að ég muni geta beitt mér að góðu einu.