um fundarstjórn.
rannsókn á einkavæðingu Fjárfestingarbanka atvinnulífsins, Landsbankans og Búnaðarbankans.
rannsókn á einkavæðingu Fjárfestingarbanka atvinnulífsins, Landsbankans og Búnaðarbankans.
Virðulegur forseti. Ég ætla ekki að finna að fundarstjórn forseta heldur nýta þennan dagskrárlið til að beina spurningu til hæstv. forseta. Í morgun afhenti rannsóknarnefnd Alþingis forseta skýrslu um þátttöku Hauck & Aufhäuser í einkavæðingu Búnaðarbanka Íslands hf. árið 2003. Við umfjöllun málsins í stjórnskipunar- og eftirlitsnefnd og kynningu á málinu í morgun kom fram auðvitað hið augljósa, að hér er um að ræða einungis hluta stórs máls.
Á 141. löggjafarþingi var samþykkt tillaga til þingsályktunar um rannsókn á einkavæðingu Fjárfestingarbanka atvinnulífsins, Landsbanka Íslands og Búnaðarbankans. Hér liggur fyrir að við sjáum aðeins hluta heildarmyndarinnar við útgáfu og framkomu þessarar rannsóknar. Þess vegna vil ég spyrja hæstv. forseta hvort hann vilji ekki leggjast á árar með okkur í þinginu, enda liggur fyrir samþykkt þingsályktunartillaga, um að tryggja fjármagn (Forseti hringir.) til að hefjast handa við að leggja upp í þessa rannsókn sem þingið hefur samþykkt til þess að freista þess að fá heildarmynd af málinu.
Forseti leggur til að málið verði rætt á mánudagsfundi forseta með þingflokksformönnum.
Frú forseti. Ég hafði hugsað mér að taka undir spurningar hv. þm. Svandísar Svavarsdóttur, þingflokksformanns Vinstri grænna, til forseta um hvað hann hyggist gera varðandi samþykkt Alþingis frá haustinu 2012 um að rannsaka einkavæðingu Fjárfestingarbanka atvinnulífsins, Landsbanka Íslands og Búnaðarbanka Íslands. Forseti hefur stungið upp á því að þingflokksformenn ræði þetta á fundi sínum og þá bið ég forseta um að sá fundur verði haldinn sem fyrst því að þessi rannsókn sem er skýr og afdráttarlaus, en mjög afmörkuð, kallar einmitt á að þessari samþykkt Alþingis sem gerð var haustið 2012 verði fylgt strax eftir.