Hæstv. forseti. Við hv. þingmenn Framsóknarflokksins styðjum þetta frumvarp. Við hefðum þó viljað ganga lengra við vinnslu frumvarpsins núna og koma á móts við þá einstaklinga sem misstu eignir sínar við efnahagshrunið og hafa verið fastir á leigumarkaði síðan þá. Við styðjum það hins vegar og fögnum þeim skrefum sem stigin eru að því sé vísað til hæstv. fjármála- og efnahagsráðherra að vinna að lausn fyrir þennan hóp. Við viljum hvetja hann til að bretta upp ermar og koma með frumvarp þessa efnis nú á haustdögum svo við getum séð aðgerðir í þágu hópsins strax á haustþingi. Við hv. þingmenn Framsóknarflokksins styðjum þetta frumvarp.

Frú forseti. Ég er á nefndaráliti minni hlutans í þessu máli og er þeirrar skoðunar að þetta frumvarp sé ekki til þess fallið að laga vandamálið sem er til staðar. Ég sagði það í ræðu minni um þetta mál síðast þegar það var rætt. Það þarf raunverulegar aðgerðir í húsnæðismálum fyrir ungt fólk á Íslandi. Það frumvarp sem samþykkt var hér síðast varð ekki til þess að leysa það vandamál. Þessi redding mun ekki heldur laga það þannig að ég mun sitja hjá í þessu máli og býst við að fleiri muni gera það.