óháð, fagleg staðarvalsgreining fyrir nýtt þjóðarsjúkrahús, frh. síðari umræðu.
Virðulegi forseti. Það er ánægjulegt að fá tækifæri til þess að fjalla hér í örstuttri ræðu um staðarval Landspítalans. Ég vil nota tækifærið hér til þess að þakka meiri hluta þingsins í 16 ár fyrir að styðja uppbyggingu við Hringbraut fyrir afdráttarlausa afstöðu og skýran stuðning við uppbyggingu nýs Landspítala við Hringbraut. Í 16 ár hefur það verið skýrt héðan úr þingsal og hefur verið gríðarlega mikilvægt fyrir þá uppbyggingu sem þar er að þar hefur aldrei orði hlé á.
Virðulegi forseti. Mér er sérstök ánægja að fara hér yfir brot úr þingræðu hv. þm. Vigdísar Hauksdóttur, þáverandi formanns fjárlaganefndar, í ræðu 3. desember 2014 þegar hún segir, með leyfi forseta:
„Það er með miklu stolti sem ég mæli fyrir nefndaráliti meiri hluta fjárlaganefndar um fjárlög sem sett eru hér í annað sinn í tíð hæstv. forsætisráðherra Sigmundar Davíðs Gunnlaugssonar og ríkisstjórnar hans.“
Og síðar: „Í þriðja lagi er gert ráð fyrir að veita ný framlög samtals að fjárhæð 7,3 milljarðar kr. Þar má nefna styrkingu á rekstrargrunni Landspítalans og fleiri sjúkrahúsa, hönnun á meðferðarkjarna við nýjan Landspítala — afar ánægjulegt, þarna er ríkisstjórnin að gefa vísbendingu um það sem koma skal og raunverulega að skapa þá framtíðarsýn að Landspítalinn verði byggður upp þar sem hann er.“
Afar ánægjulegt. Þarna er ríkisstjórnin að gefa vísbendingu um það sem koma skal og raunverulega að skapa þá framtíðarsýn að Landspítalinn verði byggður upp þar sem hann er. (Gripið fram í: Heyr, heyr.)
Virðulegi forseti. Þetta er til marks um að aldrei hefur komið hlé í skýra afstöðu meiri hluta Alþingis öll þessi ár með uppbyggingunni við Hringbraut. (Gripið fram í: Já.) Það hlé verður heldur ekki núna þegar meiri hluti Alþingis mun enn einu sinni taka afdráttarlausa afstöðu til núverandi ákvörðunar um staðsetningu og uppbyggingu Landspítalans – háskólasjúkrahúss við Hringbraut við þetta ánægjulega tækifæri við þinglok nú á vorinu 2018 í sömu viku og við opnum tilboð um jarðvegsframkvæmdir og hönnun nýs rannsóknarkjarna.
Virðulegi forseti. Það er gott að fá tækifæri til þess að staðfesta það eina ferðina enn að ákvörðunin um staðsetningu við Hringbraut var rétt. Það er mikilvægt fyrir sjúklinga. Það er mikilvægt fyrir fjölskyldur þeirra. Það er mikilvægt fyrir starfsfólk Landspítalans sem allt of lengi hefur þolað erfiðan húsakost. Það er mikilvægt fyrir heilbrigðisþjónustuna. Það er mikilvægt fyrir okkur öll að taka stolt þátt í því að styðja hér á meiri hluta Alþingis eina ferðina enn að hefja stærstu framkvæmd lýðveldistímans sem við eigum vonandi öll eftir að verða stolt af. Ég hlakka til að taka fyrstu skóflustunguna að meðferðarkjarnanum nú í sumar, það sumar sem við höldum um leið upp á 100 ára fullveldi Íslands. (Gripið fram í: Heyr, heyr.)
Virðulegi forseti. 16 ár eru langur tími. Á 16 árum breytist margt, samfélög þróast, borgin hefur þróast en samt sem áður eru það kerfisflokkarnir, kerfiskallarnir og kerfiskonurnar sem berja hausnum við steininn, halda áfram vitleysunni og sýna fram á að betra sé að gera þetta á öðrum stað. Haldið er áfram.
Það er misskilningur að menn hafi lagt til að hætt verði og skrúfað fyrir við Hringbraut. Auðvitað þarf að gera þar ákveðna hluti, það vita allir.
Virðulegi forseti. Mál þetta hefur verið fast í þingnefnd mjög lengi vegna þess að stjórnarmeirihlutinn tók það í gíslingu, sérstaklega þingmenn Vinstri grænna, og hleyptu því ekki áfram í nefndinni. Það er sannleikurinn í málinu. Við höfum komið inn á það áður.
Mig langar að endingu nefna að 25. október 2016, held ég það hafi verið, boðaði Framsóknarflokkurinn til blaðamannafundar með fulltrúum Betri spítala á betri stað, eða eitthvað slíkt, þar sem blásið var til sóknar og sagt að breyta ætti um kúrs og byggja spítalann á nýjum stað. Nú er búið að skipta um skoðun, líkt og í svo mörgu öðru hjá þeim ágæta flokki. Við sjáum væntanlega í annað sinn í dag flokkinn hverfa fá loforðum og stefnu sinni um annan stað. Sama gildir um Sjálfstæðisflokkinn þar sem forystan ákvað að fara á skjön við ályktanir flokksmanna, gera þær að engu. Það er mjög merkilegt að upplifa þetta á svo skömmum tíma. Ég hugsa að þeir einu sem eru samkvæmir sjálfum sér í stjórnarmeirihluta séu Vinstri grænir. Þeir hafa allan tímann viljað gera einhverja vitleysu og mistök í málinu.
Virðulegi forseti. Það er ágætt að við komumst til þessarar atkvæðagreiðslu. Þá drögum við fram hvað það er sem stjórnarherrar hér raunverulega vilja, hvort meining er á bak við stóru orðin sem þeir höfðu uppi um spítalann, ályktanir Sjálfstæðisflokksins og stór orð Framsóknarmanna.