fjöldi háskólamenntaðra.
Virðulegi forseti. Fyrirspurn minni er beint til hæstv. mennta- og menningarmálaráðherra. Nú er ljóst að fjöldi háskólamenntaðra á Íslandi hefur þrefaldast frá aldamótum en á sama tíma hefur fjárhagslegur ávinningur háskólamenntunar dvínað hratt. Í dag er hann með því allra minnsta í Evrópu. Háskólamenntuðum fjölgar en sérhæfðum störfum í takt við þá þróun fjölgar ekki og eru háskólamenntaðir nú næstfjölmennasti hópur atvinnulausra sé hann flokkaður eftir menntun.
Á sama tíma og við sjáum að í ákveðnum greinum er sýnilegur skortur á nemendum, svo sem í iðn- og raungreinum, virðist, og það er ekki mjög þægilegt fyrir mig persónulega að viðurkenna, umframframboð vera á útskrifuðum viðskipta- og lögfræðingum. Það er því ljóst að framboð háskólamenntaðra og eftirspurn atvinnulífsins er ekki í jafnvægi og þróunin bendir heldur ekki til þess að það muni lagast af sjálfu sér.
Spurning mín er því þessi: Sér ráðuneytið blikur á lofti í þessum efnum? Hefur ráðuneytið skoðað eða ætlar að skoða aðgerðir eða koma upp áætlun til að takast á við þessa þróun? Þurfum við ekki að huga að aðgerðum til að jafna betur framboð háskólamenntaðra og eftirspurn atvinnulífsins?
Virðulegi forseti. Ég þakka fyrir þessa góðu fyrirspurn. Hún er mjög tímabær vegna þess að það er hárrétt sem hv. þingmaður nefnir, það er misræmi á milli þeirra sem eru útskrifaðir og þeirrar eftirspurnar sem er í atvinnulífinu.
Hún spyr um aðgerðir. Fyrst ber að nefna varðandi iðn-, verk- og starfsnámið að við erum að fara í umtalsverðar aðgerðir hvað það varðar. Við höfum verið að endurskoða reiknilíkanið fyrir framhaldsskólastigið og við þá endurskoðun er sérstök vigt á iðn-, verk- og starfsnámið. Við erum að bæta starfsaðstöðu í framhaldsskólum til þess að bæta öll skilyrði og vinna betur að þróun iðn-, verk- og starfsnáms.
Annað sem við erum líka að gera er til að mynda vegna þess að það er hreinlega skortur á kennurum inn í framtíðina, við erum að setja sérstaka fjármuni til þess að auka eftirspurn eftir því að fara í kennaranám. Við höfum sett sérstaklega 50 milljónir í það verkefni.
Það sem við höfum hins vegar séð, sem er mjög jákvætt og ég vil benda hv. þingmanni á, er aukning í innritun í ákveðnar greinar, t.d. rafiðn, 33% aukning núna í haust. Eins sjáum við líka aukningu varðandi kennaramenntunina þannig að nú þegar erum við farin að sjá einhvern ávinning af þeim aðgerðum sem við höfum farið í .
Virðulegi forseti. Ég þakka hæstv. mennta- og menningarmálaráðherra fyrir góð svör. Það er mjög gaman fyrir mig að heyra hvernig þessi þróun virðist vera að ganga og að ráðherra ætli að beita sér í þessum efnum.
Þá langar mig að bæta við spurninguna hvort hæstv. ráðherra ætli sér að leggja einhvers konar sérstaka áherslu á að kynjajafna tilteknar stéttir, svo sem að hjálpa stúlkum eða leggja áherslu á að stúlkum fjölgi í tilteknum greinum og sömuleiðis að karlmönnum fjölgi í öðrum þar sem þeir hópar hafa verið í minni hluta.
Virðulegur forseti. Mig langar líka aðeins að nefna og bæta við svarið áðan að til að mynda á morgun fundar Vísinda- og tækniráð og þar er sérstök áhersla á færniþörf og að tengja hana við vinnumarkaðinn. Eitt af því sem ég tel að við getum gert mun betur á Íslandi er að tengja saman menntastefnu og atvinnustefnu. Þá erum við einmitt komin inn á það sem hv. þingmaður var að nefna, að það sé gott samspil þarna á milli þannig að þeirri eftirspurn sem er í hagkerfinu sé mætt í menntun.
Ég vil líka nefna að við erum að skoða kynjahlutföllin. Ef við náum að fjölga þeim stúlkum sem innritast í verk-, iðn- og starfsnám náum við svipuðum hlutföllum og eru á Norðurlöndunum, í Evrópu, þannig að þetta er fyrst og síðast kynjahalli varðandi þessar greinar. Við erum að skoða það og erum meðvituð um það.