Virðulegur forseti. Ég þakka hæstv. ráðherra fyrir frumvarpið og framsöguna. Ég minnist þess að hafa fjallað um þetta mál þegar það kom inn í utanríkismálanefnd til að aflétta stjórnskipulegum fyrirvara og gott að sjá þetta hér í frumvarpi.

Það er eitt sem ég minnist, virðulegur forseti, að hafi komið til tals hjá okkur og það var varðandi RÚV. Við áttuðum okkur ekki nógu vel á því hvort þetta ætti við um RÚV. Ég man að það var sérstök umræða hjá okkur um þetta. Þetta er reyndar sérstakt áhugaefni hjá mér því að ég hef fengið víða ábendingar um efni, t.d. það sem KrakkaRÚV er með, að það sé ekki opið fyrir það erlendis og þá á ég við fyrir Íslendinga sem búsettir eru erlendis. Það er oft mjög erfitt að nálgast barnaefni á íslensku fyrir þann hóp þannig að ég hef ítrekað bent á KrakkaRÚV og það frábæra efni sem þar er að finna. Þótt ég ætli ekkert endilega að hrósa RÚV fyrir margt finnst mér full ástæða til að hrósa því fyrir störfin þegar kemur að menningarefni fyrir börn.

Myndi þessi lagabreyting með einhverjum hætti opna á það eða er það bara ákvörðun hæstv. ráðherra að bregðast við því með einhverjum hætti að RÚV geti opnað sína þjónustu fyrir fólk sem er staðsett erlendis? Þá er ég sérstaklega að vísa til Íslendinga sem búsettir eru erlendis.

Síðan langaði mig að spyrja hvort hæstv. ráðherra hefði látið fara fram einhverja skoðun nú þegar á þeim breytingum sem áttu sér stað á höfundalögunum hjá Evrópuþinginu ekki alls fyrir löngu. Þau mál fengu töluverða umræðu í fjölmiðlum. (Forseti hringir.) Ég klára svo í næsta andsvari.

Virðulegi forseti. Ég þakka hv. þingmanni fyrir að spyrja um Ríkisútvarpið. Það sem þetta frumvarp sem ég mælti hér fyrir gerir er að Ríkisútvarpinu er heimilt að gera þetta, en það er ekki skylda. Ég er hins vegar á því að það sé mjög brýnt að opna fyrir þetta. Þá er ég m.a. að hugsa um að börn og ungmenni hafi aðgengi að dagskrá Ríkisútvarpsins og fjölskyldur sem vilja efla tungumálið, sem búa í skamman tíma erlendis. Ég myndi fagna því ef ég og hv. þingmaður færum saman í þá vegferð að tryggja gott aðgengi að efni Ríkisútvarpsins erlendis.

Hv. þingmaður spurði einnig um ný höfundalög sem hafa verið til umræðu. Við erum að skoða þetta í ráðuneytinu og mér væri ljúft og skylt að mæta fyrir allsherjar- og menntamálanefnd til að gera grein fyrir okkar mati á áhrifum þessara nýju laga og umræðunni um þau.

Virðulegur forseti. Ég þakka hæstv. ráðherra fyrir greinargóð svör. Ég tek heils hugar undir með henni um mikilvægi þess að Íslendingar búsettir erlendis hafi gott aðgengi að efni RÚV og sérstaklega er ég að velta fyrir mér íslenskukunnáttu barna þar sem á netinu flæðir nú mjög mikið af efni en yfirleitt er það á ensku og erfiðara er að nálgast íslenskt efni.

Mig langar líka að taka fram að ég held að einmitt í þessum lögum eins og mörgum öðrum sem við tökum upp frá Brussel — ég er ekkert alltaf neitt ofboðslega hrifin af því, virðulegur forseti — snúist málið um neytendavernd. Þetta gerir það einmitt. Ég tel að það sé mikill hagur í þessu fólginn fyrir íslenska neytendur, hvort sem um er að ræða íslenskar efnisveitur eins og RÚV, en ekki síður áskrift að Netflix eða öðru og geta notað það hvar sem er í heiminum.

Ég þakka hæstv. ráðherra fyrir svarið. Ég held að það verði mjög spennandi að fylgjast með umræðunni um höfundaréttarlögin sem samþykkt voru í Evrópuþinginu, með hvaða hætti við tökum þau upp í EES-samninginn og innleiðum. Það sem ég velti kannski helst fyrir mér er hvort það muni hafa einhver áhrif á ýmis mál sem við erum með til umræðu í þinginu, ég er sérstaklega að vísa í mál sem eru í efnahags- og viðskiptanefnd varðandi rafræn viðskipti og rétthafasamtök hafa gert athugasemd við, m.a. á þeim forsendum að það séu að verða breytingar á höfundaréttarlögunum í Evrópu. Þess vegna er gott að við fylgjumst mjög vel með.

Varðandi Evrópumálin skiptir hagsmunagæsla okkar einmitt á fyrri stigum miklu máli. Í ljósi þess að við höfum eytt miklum tíma í að ræða orkupakka þrjú og lög sem samþykkt voru úti í Brussel 2009 er gott að við færum okkur aðeins nær í tíma þegar fjallað er um lagabreytingar í Evrópu sem við munum kannski taka upp.

Virðulegi forseti. Ég held að það sé einmitt mjög brýnt að við vegum og metum áhrifin af nýjum höfundalögum sem eru nú til umræðu hjá Evrópuþinginu. Ég er hjartanlega sammála hv. þingmanni um mikilvægi þess að kortleggja stöðuna og kanna á fyrri stigum málsins áður en við tökum viðkomandi löggjöf eða tilskipanir eða reglugerðir upp í okkar lög, að við séum búin að sjá hvar okkar hagsmunir liggja og hvernig við getum brugðist við og ekki bara brugðist við heldur haft áhrif í þeim málaflokkum sem skipta okkur miklu máli. Þetta er svolítið spurning um hugarfarsbreytingu, hvernig við nálgumst þetta alþjóðasamstarf, því að það er okkur mjög mikilvægt og ábatinn af því og ávinningurinn hefur verið verulegur. En það er auðvitað mismunandi eftir því hvert umræðuefnið er. Mestu máli skiptir að við séum mjög vel með á nótunum snemma í ferlinu.

Forseti. Píratar fagna vissulega tilkomu þeirrar reglugerðar sem um ræðir og frumvarpinu sem hér liggur fyrir. Ég vil vitna í stefnu Pírata um internetið sem eitt markaðssvæði, með leyfi forseta:

„Það sem er í daglegu tali kallað internetið var hannað til þess að koma í veg fyrir að upplýsingar glatist. Það þýðir að engar aðgangstakmarkanir eru byggðar inn í samskiptamiðilinn, sem internetið er orðið, sem slíkan. Aðgangstakmarkanir koma í veg fyrir frjálst flæði upplýsinga og fela í sér eftirlit með samskiptum manna á milli, við það myndast hætta á að gengið verði á borgararéttindi. Vegna þess hvernig internetið er hannað, án landamæra, þá er það óhjákvæmilega eitt markaðssvæði með tilliti til vara sem eru einungis til á internetinu eða í stafrænu formi.“

Það liggur einnig í hlutarins eðli að þegar við erum með tækni eins og hið svokallaða internet er erfitt að setja hömlur á það. Með því að fella niður stafræn landamæri er þannig einnig verið að tryggja að notendur þess séu ekki óafvitandi að brjóta lög. Af þessu ætti því bæði að leiða að notendur eru í minni hættu að brjóta lög óafvitandi og yfirvöld landanna þurfa ekki að eyða miklum fjármunum í að framfylgja bönnum sem þjóna í raun litlum tilgangi. Auk þess hefur raunin verið sú að þjónustuveitendur eru settir í hlutverk svokallaðrar internetlöggu til þess að framfylgja slíkum bönnum, sem getur komið í veg fyrir að friðhelgi einkalífs notenda sé tryggð með fullnægjandi hætti.

Flytjanleiki þjónustu gerir það einnig þægilegra fyrir neytendur að nýta þær þjónustuveitur sem þeir eru áskrifendur að þannig að ekki skapast ástand þar sem fólk getur ekki notað alþjóðlega stafræna þjónustu við það eitt að fara yfir landamæri þar sem það eru tæknilega séð engin landamæri innan EES-svæðisins og því væri kjánalegt að viðhalda stafrænum landamærum innan svæðisins. Þetta er því frábært fyrir neytendur og internetnotendur og við Píratar fögnum því að þetta frumvarp sé komið fram.

Virðulegi forseti. Það er brýnt að efla neytendavernd á Íslandi og frumvarpið sem ég hef verið að mæla fyrir er einn liðurinn í því. Þetta eykur aðgengi áskrifenda að þeirri þjónustu sem þeir hafa greitt fyrir og er því mikilvæg réttarbót hvað það varðar.

Virðulegur forseti. Ég tek undir með þeim þingmönnum sem hafa nefnt að akkur væri í því að auka aðgengi að efni Ríkisútvarpsins og ég tel að það geti skipt miklu máli fyrir þá sem eru búsettir tímabundið erlendis og tel að við ættum að skoða það í sameiningu.

Virðulegi forseti. Þetta er framfaramál. Þetta snýr að neytendavernd og mun auka hag og réttindi neytenda.