Virðulegi forseti. Í ljósi þess sem hv. þm. Helga Vala Helgadóttir fór yfir í sambandi við það hvort þetta byndi hendur persónuverndarfulltrúa of mikið vil ég bara koma því á framfæri fyrir mitt leyti, að hvaða gagni sem það kann að koma, að ég tel svo ekki vera vegna þess að textinn segir að persónuverndarfulltrúa sé „óheimilt að segja frá nokkru því sem hann hefur fengið vitneskju um í starfi sínu og leynt á að fara“.

Það er sjálfsagt að skoða þetta betur og hafa það á hreinu. Ef það er mögulegt finnst mér það góð málsmeðhöndlun en ég vildi koma upp í ljósi þessa og útskýra mína túlkun á ákvæðinu eins og hún stendur í dag með fyrirvara um téða skoðun.

Virðulegi forseti. Bara í ljósi þess sem hér hefur komið fram vil ég segja að það varð smámisskilningur milli mín og hv. þm. Helgu Völu Helgadóttur í umræðunni fyrr um þetta mál. Ég held að það sé allt í lagi að við tökum málið inn og skoðum það í ljósi þeirra þriggja mála sem hér er vitnað til þannig að það sé örugglega samræmi. Það er ekki gott að vera með lög sem er ekki samræmi í þannig að ég held að þetta ætti að taka stutta skoðun og fá bara athugun frá ráðuneytinu og skýringu á textanum þannig að við séum alveg með það á hreinu.

Ég óska því eftir að málið fari á milli umræðna til nefndarinnar.