Virðulegur forseti. Ég flyt nefndarálit með breytingartillögu um frumvarp til laga um breytingu á lögum um Ríkisútvarpið, fjölmiðil í almannaþágu, nr. 23/2013. Tilgangur frumvarpsins er að láta sérreglur gilda um upplýsingagjöf um Ríkisútvarpið eins og ætlun löggjafans var en misfarist hafði við lagasetningu á 141. löggjafarþingi. Áfram er litið til þess að úrskurðarnefnd um upplýsingamál geti leyst úr ágreiningi sem verður um túlkun á 1. gr. frumvarpsins. Þrátt fyrir að samþykktum Ríkisútvarpsins hafi verið breytt er talið að veita þurfi ákvæði þessu lagastoð og að samþykktir Ríkisútvarpsins dugi ekki til. Fyrirhuguð lagabreyting var kynnt stjórn Ríkisútvarpsins í tengslum við breytingar á samþykktum félagsins.

Allsherjar- og menntamálanefnd hefur fjallað um málið og fengið gesti á sinn fund frá menntamálaráðuneytinu, forsætisráðuneytinu, Blaðamannafélagi Íslands og frá Persónuvernd. Tvær umsagnir bárust frá Blaðamannafélagi Íslands og Persónuvernd.

Samkvæmt 1. mgr. b-liðar 1. gr. frumvarpsins er enn fremur heimilt að veita upplýsingar um viðurlög í starfi sem æðstu stjórnendur hafa sætt, þar á meðal vegna áminninga og brottvísana, enda séu ekki liðin meira en fjögur ár frá þeirri ákvörðun sem um ræðir. Í greinargerð með frumvarpinu kemur fram að ekki verði séð að ríkir almannahagsmunir séu af því að gert sé uppskátt um áminningu sem stjórnandi hefur hlotið vegna áfengisneyslu í samanburði við hagsmuni viðkomandi starfsmanns af því að vera gefinn kostur á því að bæta ráð sitt án þess að eiga á hættu að vera um ókomna tíð stimplaður fyrir slíka háttsemi. Í þessu sambandi var bent á að samkvæmt 3. tölulið 1. mgr. 3. gr. laga um persónuvernd og vinnslu persónuupplýsinga, nr. 90/2018, eru viðkvæmar persónuupplýsingar m.a. skilgreindar sem upplýsingar um stjórnmálaskoðanir, trúarbrögð og lífsskoðun, heilsufarsupplýsingar, upplýsingar um lyfja-, áfengis- og vímuefnanotkun og upplýsingar um kynlíf manna og kynhneigð. Taka þurfi af allan vafa ef ætlunin er ekki að veita heimild til upplýsingagjafar um forsendur viðurlaga eða áminningar sem æðstu stjórnendur Ríkisútvarpsins hafi sætt ef viðurlögin eru byggð á viðkvæmum persónuupplýsingum.

Með hliðsjón af framangreindu telur meiri hlutinn betur fara á því að texta 1. mgr. b-liðar 1. gr. frumvarpsins verði breytt til samræmis við efni greinargerðarinnar og þannig áréttað að upplýsingaréttur almennings nái ekki til viðkvæmra persónuupplýsinga. Meiri hlutinn leggur til breytingar þess efnis.

Að öðru leyti leggur meiri hlutinn til breytingar sem eru tæknilegs eðlis og er ekki ætlað að hafa áhrif á efni frumvarpsins. Meiri hlutinn leggur til að frumvarpið verði samþykkt með breytingartillögum sem eru svo taldar upp og ég ætla ekki að lesa þær, þær liggja fyrir á þskj. 1052.

Hv. þm. Þorsteinn Sæmundsson var fjarverandi við afgreiðslu málsins.

Undir nefndarálitið rita hv. þingmenn Páll Magnússon, Silja Dögg Gunnarsdóttir, Bjarkey Olsen Gunnarsdóttir, Birgir Ármannsson, Olga Margrét Cilia og Steinunn Þóra Árnadóttir.