Virðulegi forseti Ég mæli hér með fyrir frumvarpi til laga um breytingu á ýmsum lögum um skatta og gjöld. Efnisatriði frumvarpsins eru af margvíslegum toga og ég hyggst reyna að gera grein fyrir hverjum og einum af helstu þáttum.
Það er í fyrsta lagi almannaheillaskrá. Með lögum sem öðluðust gildi 1. nóvember sl. voru gerðar breytingar til eflingar á skattumhverfi lögaðila sem starfa til almannaheilla og falla undir þriðja geirann. Í lögunum er gert ráð fyrir að fyrirtækjaskrá Skattsins haldi sérstaka almannaheillaskrá og gert ráð fyrir því í lögunum að viðkomandi lögaðili sem veitir viðtöku framlagi sé skráður í skrána þegar gjöf eða framlag er afhent. Þar sem Skatturinn mun halda almannaheillaskrá ólíkt almannaheillafélagaskrá, sem fyrirtækjaskrá Skattsins heldur, er lagt til að tilvísun til fyrirtækjaskrár verði felld brott úr lögunum. Þá er lagt til að í stað tilvísunar til laga um skráningarskyldu félaga til almannaheilla með starfsemi yfir landamæri verði vísað til laga um félög til almannaheilla vegna skráningar og hæfis lögaðila eftir því sem við á í almannaheillaskrá Skattsins.
Í lögum um tekjuskatt er kveðið á um að lögaðilar sem hafa með höndum starfsemi sem telst til almannaheilla og skráðir eru í sérstaka almannaheillaskrá Skattsins greiði ekki tekjuskatt. Lagt er til að í lögunum verði annars vegar kveðið á um það skilyrði fyrir skráningu lögaðila í almannaheillaskrá að staðin hafi verið skil á ársreikningi til ríkisskattstjóra og að ekki sé um að ræða vanskil eða áætlanir skatta, skattsekta, gjalda og skýrsluskila. Hins vegar að ákvörðun ríkisskattstjóra um höfnun á skráningu eða afskráningu verði kæranleg til yfirskattanefndar. Þá þykir jafnframt rétt að kveða á um kærufrest hafni ríkisskattstjóri lögaðila um skráningu í almannaheillaskrá eða úrskurði aðila af almannaheillaskrá. Þá þykir ástæða til að upplýsingaskylda þeirra sem skráðir eru í almannaheillaskrá sé tilgreind sérstaklega í lögum um tekjuskatt, vegna eftirlitshagsmuna.
Næst er það um skattfrádrátt vegna hlutabréfakaupa. Í frumvarpinu er lagt til að gildistími úrræðis varðandi skattfrádrátt vegna hlutabréfakaupa verði framlengdur um þrjú ár. Í gildandi lögum er gert ráð fyrir að einstaklingar geti nýtt sér frádrátt frá tekjuskattstofni, að viðbættum fjármagnstekjum, vegna fjárfestinga á árunum 2016–2021. Að óbreyttu yrði því síðasta skattívilnunin veitt við álagningu opinberra gjalda á árinu 2022 vegna fjárfestinga á árinu 2021. Framlenging úrræðisins er í samræmi við stefnu ríkisstjórnarinnar um að auka aðgengi að fjármagni fyrir bæði nýsköpunarfyrirtæki og smærri fyrirtæki í vexti og er talið að úrræðið geti haft mikla þýðingu fyrir slík fyrirtæki.
Þá að refsinæmi vegna vanframtalinna fjármagnstekna hjóna. Samkvæmt tekjuskattslögum skal leggja fjármagnstekjur hjóna saman og telja til tekna hjá því hjóna sem hefur hærri hreinar tekjur. Þegar skýrt er rangt eða villandi frá einhverju um fjármagnstekjurnar í sameiginlegu framtali hjóna er einungis háttsemi þess tekjuhærri lýst refsiverð. Telja verður eðlilegt að saknæmið og refsinæmið snúi að þeim sem tekjurnar tilheyra og telur þær ekki fram í sameiginlegu framtali. Því er lagður til nýr málsliður þess efnis að refsiákvæði laganna taki einnig til tekjuskatts af þeim tekjum sem tilheyra tekjulægri makanum en telja ber fram hjá því hjónanna sem hærri hefur tekjur.
Í fjórða lagi er það skipting gjalddaga þing- og sveitarsjóðsgjalda einstaklinga og útvarpsgjalds. Í frumvarpinu er að finna tillögur sem tengjast skiptingu gjalddaga þing- og sveitarsjóðsgjalda einstaklinga og útvarpsgjalds. Fyrirkomulag skiptingar greiðslna niður á nokkra gjalddaga hefur valdið flækjustigi í framkvæmd þegar gjaldendur greiða eftirstöðvar upp á fyrsta gjalddaga. Þannig myndast inneign sem ber inneignarvexti á meðan eldri skuld fellur í gjalddaga. Því er lagt til að við framtalsskil geti framteljandi óskað eftir að greiða eftirstöðvar álagðra skatta og gjalda í einu lagi á fyrsta gjalddaga eftir álagningu en ella verði eftirstöðvunum skipt á hefðbundna gjalddaga samkvæmt gildandi lögum.
Í fimmta lagi eru það fjárhæðarmörk skattskyldu við sölu á raforku eða heitu vatni. Hér er lögð til sú breyting á fjárhæðarmörkum að þau verði hækkuð. Samkvæmt lögum um umhverfis- og auðlindaskatta eru þeir sem selja raforku eða heitt vatn til endanlegra notenda fyrir minna en 500.000 kr. á ári undanþegnir skattskyldu. Lagt er til að fjárhæðarmörkin verði hækkuð í 2 milljónir en við mat á fjárhæðinni er meðal annars litið til veltumarka virðisaukaskatts. Við lögfestingu laga um umhverfis- og auðlindaskatta áttu fjárhæðarmörk skattskyldunnar sér samsvörun í veltumörkum laga um virðisaukaskatt, þ.e. 500.000 kr. Sú fjárhæð hefur ekki tekið breytingum í samræmi við þær breytingar sem orðið hafa á veltumörkum virðisaukaskatts. Hins vegar var fallið frá skattlagningu af raforku frá og með árinu 2016 og því tekur tillagan einungis til fjárhæðarmarka við sölu á heitu vatni. Hækkunin einfaldar rekstrarumhverfi aðila með lítil umsvif og auðveldar eftirlit. Þá er einnig lagt til að orðalagi ákvæðisins verði breytt til samræmis við orðalag laga um virðisaukaskatt, þ.e. að miða skuli við tekjur á hverju tólf mánaða tímabili, en ekki almanaksárið.
Næst eru það frekari breytingar á lögum um virðisaukaskatt. Samkvæmt lögunum skal miða skattverð vöru sem afhent er án endurgjalds við almennt gangverð í sams konar viðskiptum. Liggi slíkt verð ekki fyrir skuli miða skattverð við reiknað útsöluverð þar sem tekið er tillit til alls kostnaðar að viðbættri þeirri álagningu sem almennt er notuð á vörur eða þjónustu af sama tagi. Í skattframkvæmd hefur skráðum aðila m.a. borið að greiða virðisaukaskatt af andvirði vöru jafnt sem skattskyldrar þjónustu sem afhent er án endurgjalds og miðar tillaga frumvarpsins að því að skjóta styrkari stoðum undir þá framkvæmd. Þá er lagt til að tekin verði upp í lögin sérregla um skattverð þegar skattaðili móttekur notað lausafé í eigu einstaklinga utan rekstrar í umboðssölu. Skattaðili kemur þá fram í nafni eiganda og fyrir hans reikning. Sérreglan heimilar umboðsmanni að miða skattverð við söluþóknun samkvæmt samningi aðila að ákveðnum skilyrðum uppfylltum. Séu þau skilyrði ekki uppfyllt kemur til álita að fella viðskipti undir sölumiðlun enda séu skilyrði hennar uppfyllt. Að öðrum kosti ber skattaðila að innheimta virðisaukaskatt af heildarandvirði hins selda samkvæmt lögum um virðisaukaskatt.
Næst um losunarviðmið. Gert er ráð fyrir breytingum í tengslum við losunarviðmið ökutækja en álagning skatta og gjalda á ökutæki tekur að vissu marki mið af skráðri losun koltvísýrings við notkun. Þannig er lagt til að þegar fyrir liggur að losunarviðmið er skráð bæði samkvæmt evrópsku aksturslotunni svokölluðu og samræmdu prófunaraðferðinni svokölluðu skuli eingöngu miða við skráða losun samkvæmt síðarnefndu aðferðinni. Hún er nýrri og öflugri og talin ráðandi við mat á koltvísýringslosun.
Þá að útleigu vistvænna ökutækja. Þar eru lagðar til breytingar á lögum um virðisaukaskatt vegna ákvæðis til bráðabirgða XXXIX. Ákvæðið mælir fyrir um að útleiga á skráningarskyldu ökutæki sem fallið hefur undir ívilnun á grundvelli ákvæðis til bráðabirgða XXIV sé að fullu undanþegin skattskyldri veltu að uppfylltum ákveðnum skilyrðum. Ákvæði til bráðabirgða XXIV kvað áður á um sérstaka virðisaukaskattsívilnun vegna annars vegar innflutnings og skattskyldrar sölu á nýjum rafmagns-, vetnis- eða tengiltvinnbifreiðum og hins vegar vegna innflutnings og fyrstu sölu á notuðum rafmagns-, vetnis- eða tengiltvinnbifreiðum að uppfylltum tilteknum skilyrðum. Ákvæðinu var breytt árið 2020 og það m.a. látið ná til endursölu á notuðum rafmagns-, vetnis- eða tengiltvinnbifreiðum að uppfylltum tilteknum skilyrðum. Telja verður eðlilegt að sambærileg sjónarmið gildi í báðum þessara tilvika og er því lagt til að ákvæði til bráðabirgða XXXIX nái jafnframt til framleigu á ökutækjum, sem notið hafa fyrrnefndrar ívilnunar, að uppfylltum öðrum skilyrðum sem koma fram í ákvæðinu.
Skilagrein með skilum á launaafdrætti er hér næst. Það er gert ráð fyrir breytingu á svokölluðum launaafdrætti, þ.e. þegar opinber gjöld eru ógreidd er innheimtumanni heimilt að krefja vinnuveitanda um að halda eftir allt að 75% af heildarlaunagreiðslum til launþega hverju sinni. Lagt er til að áréttað verði í lögum um innheimtu opinberra skatta og gjalda að launagreiðanda sé skylt að senda skilagrein með skilum á afdregnum sköttum sem honum bar að halda eftir af launum, en annars er hætta á að greiðslunni verði ekki ráðstafað með réttum hætti.
Næst um heimildir til kyrrsetningar eigna. Í frumvarpinu er að finna tillögur að breytingum á heimild til kyrrsetningar eigna. Með lögum um breytingu á lögum er varða rannsókn og saksókn skattalagabrota voru lögfest skýr skil milli stjórnsýslumála sem eru afgreidd innan skattkerfisins og alvarlegri mála sem sæta refsimeðferð samkvæmt útgáfu fyrirmæla ríkissaksóknara. Vegna þessa þykir nauðsynlegt að gera breytingar á kyrrsetningarákvæði laga um innheimtu opinberra skatta og gjalda í þá veru að kyrrsetningarheimildin taki einnig til meintrar refsiverðrar háttsemi sem varðar sektarákvörðun samkvæmt lögum um tekjuskatt, virðisaukaskatt, staðgreiðslu opinberra gjalda og staðgreiðslu skatts á fjármagnstekjur. Rannsókn og ákvörðun sekta vegna skattundanskota er nú í höndum ríkisskattstjóra í þeim tilvikum þegar þau falla ekki undir fyrirmæli ríkissaksóknara. Yfirskattanefnd fer því ekki lengur með sektarheimildir í stærri málum heldur er nefndin í hlutverki sjálfstæðrar kærunefndar sem tekur við kærum vegna ákvarðana ríkisskattstjóra um að leggja á sektir.
Breytingartillagan er í samræmi við athugasemdir í greinargerð frumvarps þess er varð að lögum um breytingu á lögum er varða rannsókn og saksókn skattalagabrota þar sem fram kemur að ekki sé stefnt að breytingum á heimildum ríkisskattstjóra til að beita viðurlögum.
Jafnframt er lögð til sú breyting að heimila kyrrsetningu á meðan mál er til meðferðar hjá lögreglu eins og í tilviki mála sem eru til skattrannsóknar og myndi ríkisskattstjóri þá annast rekstur kyrrsetningarinnar vegna rannsóknarinnar óháð því hvar hún fer fram. Þetta getur t.d. átt við þegar ekki hefur verið gerð krafa um kyrrsetningu hjá ríkisskattstjóra en nýjar upplýsingar koma fram eftir að máli hefur verið vísað til lögreglu. Þá eru einnig lagðar til smávægilegar orðalagsbreytingar. Að lokum er að finna tillögu að viðbót við lög um fjársýsluskatt sem felur í sér vísun til kyrrsetningarákvæðis laga um innheimtu opinberra skatta og gjalda.
Næst um gjöld fyrir skráningu félaga til almannaheilla. Hér eru lagðar til breytingar vegna slíkra gjalda. Lög um skráningarskyldu félaga til almannaheilla með starfsemi yfir landamæri voru sérstaklega sett til að bregðast við og uppfylla tilmæli FATF, alþjóðlegs fjármálaaðgerðahóps ríkja um aðgerðir gegn peningaþvætti og fjármögnun hryðjuverka, og var hluti af þeim aðgerðum sem stjórnvöld gripu til vegna athugasemda FATF.
Eins og fram kemur í greinargerð með þeim lögum voru þessi félög talin í mestri hættu á að vera misnotuð og var skráningarskylda þeirra í almannaheillafélagaskrá lögfest. Samkvæmt lögum um aukatekjur ríkissjóðs er gjald til skráningar félaga til almannaheilla með starfsemi yfir landamæri 83.000 kr. Gjaldið telst nokkuð hátt og talin hætta á að valin verði önnur félagaform og starfsemi félaga til almannaheilla með starfsemi yfir landamæri verði þannig falin, en það er staða sem sérstaklega átti að taka á og koma í veg fyrir. Því er lagt til að skráningargjaldið verði lækkað í 25.000 kr. sem er jafnt skráningargjaldi annarra félaga eða sambærilegra aðila. Þá er jafnframt lagt til að félög til almannaheilla sem falla undir lög um félög til almannaheilla greiði sama gjald fyrir skráningu eða 25.000 kr.
Varðandi mat á áhrifum tillagna frumvarpsins má segja að áhrif af tillögu um að framteljanda verði heimilt að óska eftir því við framtalsgerð að greiða eftirstöðvar þing- og sveitarsjóðsgjalda og útvarpsgjald á einum gjalddaga í stað þess að þær skiptist á sjö eða þrjá gjalddaga er talin vera mjög óveruleg en hagræðið hins vegar talsvert. Flækjustig við útgáfu reikninga og innheimtu verður minna fyrir Fjársýslu ríkisins og ríkissjóður mun jafnframt hafa hag af því að greiðslur skili sér fyrr í ríkissjóð. Sparnaður yrði einnig einhver þar sem mun færri kröfur yrðu stofnaðar í bankakerfinu.
Ný regla sem heimilar að virðisaukaskattur sé einungis lagður á þóknun milligönguaðila þegar notað lausafé í eigu einstaklinga er selt í umboðssölu ætti að óbreyttu að lækka verð á notuðum varningi, hvort sem það er húsbúnaður, leikföng, fatnaður og annað sem kann að vera selt er með slíku fyrirkomulagi. Aðilar sem bjóða slíka þjónustu verða sífellt fleiri og óvíst er hvort virðisaukaskatti hafi í öllum tilvikum verið skilað af fullu söluverði hingað til þar sem nokkur vafi hefur verið uppi um gildandi reglur um skattverð. Gera má ráð fyrir því að bein áhrif af þessari breytingu á tekjur ríkissjóðs verði óveruleg.
Varðandi skattfrádrátt vegna hlutabréfakaupa er áætlað að úrræðið muni leiða til lækkunar á tekjum ríkissjóðs um 30 millj. kr. árið 2022 vegna yfirstandandi árs. Ef úrræðið yrði framlengt um þrjú ár má áætla, miðað við þessar 30 millj. kr. á yfirstandandi ári, að þriggja ára framlenging gæti numið 90 millj. kr. lækkun á þessum skatti. Á móti verður að horfa til þeirra jákvæðu áhrifa sem vonast er til að þessi ívilnun hafi í för með sér til lengri tíma.
Aðrar breytingar sem lagðar eru til í frumvarpinu munu samanlagt ekki hafa teljandi áhrif á afkomu ríkissjóðs, einstaklinga eða lögaðila. Þetta eru að sumu leyti einfaldlega breytingar sem metið er að nauðsynlegt sé að gera og munu þess vegna leiða til þess að viðkomandi löggjöf á sviði skattamála verði skýrari.
Virðulegi forseti. Að þessu sögðu legg ég til að frumvarpinu verði vísað til hv. efnahags- og viðskiptanefndar og til 2. umr. að lokinni þessari umræðu.
Virðulegi forseti. Ég þakka hæstv. ráðherra fyrir framsöguna. Það er tvennt sem mig langar að ræða við hæstv. ráðherra. Annars vegar er það frádráttur frá tekjuskattsstofni vegna hlutabréfakaupa. Mér líst í sjálfu sér ágætlega á þetta úrræði og allt í góðu með að framlengja það. En vegna þess að úrræðið hefur staðið yfir frá 2016 og er að klárast núna og í greinargerð kemur ekkert meira fram heldur en að úrræðið geti haft mikla þýðingu fyrir slík fyrirtæki þá velti ég fyrir mér hvort það hljóti ekki að liggja að baki einhver greining og hvort ráðuneytið hafi ekki eitthvað meira fyrir sér en að það telji að það geti verið gott að þetta haldi áfram. Væntanlega liggur eitthvað fyrir um þau áhrif sem úrræðið hefur haft þessi fjögur ár sem það hefur verið í gildi. Ég velti því fyrir mér hvort hæstv. ráðherra gæti aðeins farið í gegnum hvað liggi að baki ákvörðun um að framlengja þetta úrræði.
Síðan langaði mig að ræða aðeins um lögaðila í almannaheillaskrá og þá lagabreytingu sem verið er að leggja til með frumvarpinu, líka í samhengi við að verið er að breyta skráningargjaldi hjá félögum sem starfa til almannaheilla og hafa starfsemi yfir landamæri. Hæstv. ráðherra vísaði vissulega í að FATF-samtökin hefðu bent á að þetta væru félögin sem væru hvað viðkvæmust fyrir misnotkun vegna peningaþvættis og fjármögnunar hryðjuverka og þess vegna væri verið að setja allt þetta regluverk í kringum félög til almannaheilla. Ég vildi því spyrja hæstv. ráðherra: Nú er verið að bæta inn ákveðnum skilyrðum til að félag fái þessa skráningu en hvað er verið að gera til að fylgja því eftir að það sé einmitt ekki verið að misnota félög til almannaheilla? Hvað er ráðuneytið að gera og hvað er það í okkar gangverki sem tryggir að ekki sé verið að misnota félög, sérstaklega þau sem eru með starfsemi yfir landamæri? Hvernig er eftirliti með því háttað?
Virðulegur forseti. Fyrst varðandi skattafslátt vegna hlutabréfakaupa þá átti frumvarpið um það efni sér nokkurn aðdraganda og hægt er að vísa til greinargerðar með frumvarpinu á sínum tíma. Hér er í raun og veru ein af mörgum stuðningsaðgerðum fyrir smærri félög sem eru hugsaðar til þess að skapa jákvætt, hvetjandi, samkeppnishæft umhverfi fyrir fyrirtæki sem stunda frumkvöðlastarfsemi í landinu. Oft á tíðum eru þetta verkefni sem hefjast í stuðningskerfi stjórnvalda, þ.e. þau fá styrk af opinberu fé og komast á legg og þurfa síðan í framhaldinu að treysta á fjármögnun víða að úr hagkerfinu. Oft á tíðum er verið að leita eftir stuðningi þeirra sem standa félaginu næst. Með því að framlengja þetta úrræði erum við að taka stöðumat eftir þetta tímabil sem er að renna sitt skeið og segja að þetta hafi gengið ágætlega. Við vitum hvert umfangið er, svona gróft metið felst 30 millj. kr. stuðningur í lagaákvæðinu og við teljum að þetta séu jákvæð merki sem ástæða sé til að taka til endurskoðunar á þessum tímapunkti og framlengja, einfaldlega í þessum tilgangi.
Almannaheillaskráin, hér er verið að bregðast við því sem gæti valdið misnotkun. Þetta frumvarp er auðvitað dæmi um eitthvað sem við gerum til að reyna að forðast misnotkun en að öðru leyti verður að vísa til allra annarra almennra aðgerða sem við höfum verið að beita til að efla eftirlitsstofnanir og alla þá sem geta haft vísbendingar um misnotkun félaganna og þar getur fjármálakerfið sjálft leikið lykilhlutverk.
Virðulegi forseti. Ég var kannski að spyrja hvort það lægi fyrir einhver greining á þessu úrræði með endurgreiðslu fyrir hlutabréfakaup og hvernig það hefur þá skipst á milli smærri sprotafyrirtækja sem það er talið hafa góð áhrif á samkvæmt greinargerð frumvarpsins. Nú er ég ný í efnahags- og viðskiptanefnd og er að koma mér inn í nýjan málaflokk en ég fæ ekki skilið þetta öðruvísi en svo að þetta gildi bara um hlutabréfakaup almennt, sama í hvaða hóp hlutabréfa þessi hlutabréfakaup falla. Þess vegna velti ég fyrir mér hvort það liggi fyrir einhver greining á hversu hátt hlutfall fer í sprotafyrirtæki og minni fyrirtæki miðað við bara venjuleg fyrirtæki á markaði sem þurfa engar sérstakar ívilnanir til að fólk kaupi í þeim hlutabréf.
Ég spurði um eftirlitið og var kannski ekki alveg að falast eftir því að heyra að fjármálageirinn ætti að fylgjast með heldur frekar til hvaða aðgerða ríkisstjórnin hefði gripið til þess að tryggja betra eftirlit með þessari félagastarfsemi sem við vitum að FATF hefur bent á sem sérstaklega viðkvæma gagnvart misnotkun og sérstaklega viðkvæma gagnvart peningaþvætti og fjármögnun hryðjuverka. Stærsta ástæðan fyrir því að við enduðum á gráum lista FATF fyrir ekki svo löngu var að við vorum með eftirlit í skötulíki. Það var bara ekkert eftirlit með því regluverki sem við vorum með. Við vorum kannski með regluverk í kringum þetta en það var enginn til að framfylgja því. Þess vegna er ég að biðja hæstv. ráðherra að fara aðeins yfir þetta. Fyrir utan að það þurfi að skrá þessi félög og búið sé að lækka einhver gjöld til að skrá þau, hvað erum við að gera til að tryggja að ekki sé verið að misnota þetta félagaform? Hvað erum við að gera til að koma í veg fyrir peningaþvætti og fjármögnun hryðjuverka?
Virðulegi forseti. Við erum að ræða frumvarp til laga um breytingu á ýmsum lögum um skatta og gjöld. Peningaþvættisregluverkið allt er í raun og veru ekki hér á dagskrá. Og þegar spurt er hvað annar ráðherra er að gera til að uppfylla skyldur sínar að lögum og ganga úr skugga um það með sínum undirstofnunum að verið sé að framfylgja eftirlitshlutverki stjórnvalda þá verð ég að segja að það er kannski ekki beint á dagskrá hér í þessu frumvarpi. En hér er lítið dæmi um það sem við getum gert til að draga úr hvatanum til að stofna félög af einu tagi umfram annað. Ég verð bara að vísa almennt til þeirrar aðgerðaáætlunar sem var innleidd hér og leiddi á endanum til þess að Ísland var tekið af gráa listanum vegna þess að við vorum búin að koma upp eftirlitskerfi, regluverki og stofnanastrúktúr sem var líklegur til að taka á þeirri hættu sem hv. þingmaður er að vekja athygli á að er ávallt til staðar.
Varðandi afslætti vegna hlutabréfakaupa vil ég taka fram að þetta eru afslættir sem eingöngu eiga við þegar fjárfest er í nýsköpunarfyrirtækjum og smærri fyrirtækjum í vexti og er laga- og regluverk sem við þurfum að passa upp á að rúmist innan ríkisstyrkjareglna. Þess vegna hefur verið horft til þess hvernig Evrópusambandið og önnur ríki á EES-svæðinu hafa beitt þessum úrræðum. Því hefur verið sýndur skilningur í samhengi við ríkisstyrkjareglur að ríki vilji örva sprota á borð við þessa í samfélögum sínum. Við höfum mjög ákveðin skilaboð frá hagsmunaaðilum þessara fyrirtækja um að þessi þáttur umhverfisins skipti verulegu máli.
Frumvarpið gengur til 2. umr.
Frumvarpið gengur til efh.- og viðskn.