frumvarp um útlendinga á dagskrá þingsins.
frumvarp um útlendinga á dagskrá þingsins.
Forseti. Ég vil lýsa sérstakri ánægju með fundarstjórn forseta og þá dagskrá sem lagt er upp með hér í dag þar sem í raun hefur verið brugðist við dagskrárbreytingartillögu Arndísar Önnu Kristínardóttur Gunnarsdóttur frá gærdeginum um að færa eingreiðslu öryrkja fremst í dagskrána og taka útlendingamál Jóns Gunnarssonar út af henni.
En mig langar að spyrja herra forseta hvort þessi breyting sé komin til að vera vegna þess að ég óttast að stjórnarliðar haldi áfram að reyna að þrýsta í gegn fyrir jól frumvarpi Jóns Gunnarssonar um að draga úr réttindum fólks á flótta. Ég hef miklar áhyggjur af því vegna þess að það myndi, eins og við ræddum hér í gær, setja öll þingstörf í uppnám. Þess vegna langar mig að spyrja virðulegan forseta: Megum við vænta þess að útlendingamálið líti ekki dagsins ljós á dagskrá þingsins hér næstu daga? Eða þurfum við alltaf að vera á tánum upp á von og óvon um það hvort forseti muni lauma málinu á dagskrá enn og aftur?
Forseti vill geta þess að hann er ekki í aðstöðu til að lauma einu eða neinu á dagskrá en það sem hv. þingmaður nefnir hér er breyting á dagskrá dagsins í dag og á þá einvörðungu við þingfundinn í dag. Í sjálfu sér liggur ekki fyrir neitt um dagskrá næstu daga að öðru leyti en því að forseti hefur greint þingflokksformönnum frá því að hann hyggist leitast við að hafa atkvæðagreiðslur um fjárlög eftir 2. umr. á mánudag. Að öðru leyti liggur ekkert fyrir um dagskrá mánudags, þriðjudags eða annarra daga eftir það.