ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.
Virðulegi forseti. Þar erum við þm. hv. Ólöf Nordal algjörlega sammála. Þarna virðist eingöngu verið að uppfylla kröfur Hreyfingarinnar um að eitthvað af þessu skuli fara í þjóðaratkvæðagreiðslu. Ég er sammála þingmanninum um að það var orðið tímabært að fá sérfræðinga í stjórnskipunarrétti og til dæmis auðlinda- og umhverfisrétti til að fara yfir tillögurnar sem stjórnlagaráð, sem kosið var af Alþingi, skilaði til Alþingis, vegna þess að á nefndarfundum í allan heila vetur var bara verið að taka á móti gestum í viðtöl og ekki verið að vinna neitt í málinu. Þannig að á þessum þingvetri hefur tapast mikill tími í þessu máli.
Það er því alveg hreint með ólíkindum að þessari þjóðaratkvæðagreiðsluhugmynd skuli vera haldið til streitu. Ég spyr þingmanninn: Segjum sem svo að það verði bara 10% þjóðarinnar sem taka þátt, kosningarbærra manna, því að í sumar göngum við í gegnum forsetakosningar, hvað er þá að marka þá skoðanakönnun í ljósi þess að þetta er (Forseti hringir.) ráðgefandi þjóðaratkvæðagreiðsla? Er þetta ekki hrein peningasóun á ríkisfé?