heilbrigðisstefna til ársins 2030.
Hæstv. forseti. Ég þakka þingmanninum fyrir ágæta ræðu. Það er þrennt sem mig langar að nefna við hv. þingmann sem ég held að sé mikilvægt að draga fram. Mér sýnist í fljótu bragði við lestur umsagna að í það minnsta í nokkrum þeirra sé kvartað yfir samráðsleysi, að stefnan hafi ekki verið unnin í nógu miklu samráði við hlutaðeigandi, t.d. læknafélaög og slíka aðila. Ég vil spyrja hv. þingmann hvort það hafi komið sterkt fram í nefndinni og hvort ástæða sé til að hafa efasemdir um stefnuna vegna þess að samráð var ekki nógu gott.
Í öðru lagi langar mig að spyrja þingmanninn út í það hvernig hann telur að hinum mikilvæga þætti frjálsra félagasamtaka sé mætt í heilbrigðisstefnunni. Þá ég við SÁÁ, Reykjalund og allt þetta sem við þekkjum, hvort stefnan rammi vel inn og haldi utan um þá starfsemi.
Í þriðja lagi, ef tími vinnst til, langar mig að vita hvort þingmaðurinn telji að eitthvað í stefnunni taki á þessu gamla og ótrúlega seiga vandamáli sem eru biðlistar, sem þingmaðurinn kom aðeins inn á í ræðu áðan. Það er í rauninni mjög merkilegt ef við erum að leggja fram stefnu sem við höfum á sama tíma ekki trú á að taki á helstu vandamálum í kerfinu, þar á meðal biðlistunum, sem eru ótrúlega langir mjög víða.
Þannig að það er í rauninni þetta þrennt, samráðsleysið, frjálsu félagasamtökin og biðlistarnir, sem mér er efst í huga.