Menntasjóður námsmanna.
Virðulegi forseti. Ég þakka fyrir umsögn hv. þingmanns og að hann taki eftir því að það sem við gerðum við vinnslu frumvarpsins var að skoða og gera hreinlega bara samanburð á þeim frumvörpum og þeirri vinnu sem hafði átt sér stað. Við hugsuðum líka út fyrir kassann um hvað við gætum gert betur og við erum sér í lagi að huga að barnafjölskyldum og því að einstaklingarnir fari minna skuldsettir inn í framtíðina vegna þess að ég held að þetta hafi orsakað ákveðinn spekileka.
Hv. þingmaður spyr hvort stúdentar geti framfleytt sér á þessu. Þarna koma úthlutunarreglurnar inn. Ég er sammála því að eitt af því sem hefur verið að gerast hér á Íslandi er að sífellt færri taka námslán. Þeir vinna með námi. Þeir klára nám mun seinna en í viðmiðunarlöndum okkar. Það er m.a. út af þessari framfærslu. Við höfum verið að auka hana svo um munar á þessu kjörtímabili og við þurfum að skoða hana enn frekar. Það þarf að vera tryggt að stúdentar geti framfleytt sér en þetta frumvarp, fullyrði ég, er risastórt skref í þá (Forseti hringir.) átt að gera kerfið mun sanngjarnara, gagnsærra og betra til framtíðar.