ríkisábyrgð á lántöku Tryggingarsjóðs innstæðueigenda og fjárfesta.
Frú forseti. Ég skirrist ekkert við því að vinna hér um nætur, er vanur því, en ég hef töluverðar áhyggjur af því eins og ég nefnt áður í kvöld, af því merki sem við gefum út í þjóðfélagið. Ég man eftir því og er hér með ræðu sem hæstv. forseti flutti á fyrsta fundi sínum 15. maí 2009 þar sem hún sagði að hún fagnaði því að nú hefðu konur aldrei verið fleiri á þingi og jafnframt að hún ætlaði að vinna að því að gera breytingar á starfsháttum Alþingis í því skyni að gera þingið fjölskylduvænna. Það sem við erum að gera hér er einmitt ekki þetta. Það sem við erum að segja við fjölskyldufólk, bæði karla og konur: „Ekki verða þingmenn, því að þá getið þið þurft að sæta því að sitja heilu næturnar, ekki eitt kvöld í viku, nei, kvöld eftir kvöld eftir kvöld á aðventunni, fjarri fjölskyldum ykkar.“ Ég kvarta ekki, frú forseti, en ég held að þetta sé afskaplega slæmt merki, ef við viljum fá jafnrétti á Alþingi og ef við viljum gera það fjölskylduvænt.