alþjóðleg þróunarsamvinna Íslands o.fl.
Herra forseti. Þess vegna er ekki verjandi að hæstv. ráðherra sé fjarverandi hér lon og don og komi ekki og svari fyrir þetta mál. Hafi menn verið í vafa um að það væri réttmæt krafa hér í byrjun dags þá ættu þeir ekki að efast um það lengur. Það er auðvitað þannig, eins og allt liggur í þessu máli, að ráðherrann einn getur svarað fyrir og staðið fyrir þeim málstað sem hann ber hérna fram. Það er algerlega búið að afhjúpa að það er ekkert á bak við þetta mál annað en vilji ráðherrans sjálfs. Hann hefur bitið þetta í sig. Kannski var hann upphaflega sannfærður um það af einhverjum einbættisgránanum í utanríkisráðuneytinu, sem liggja margir hverjir undir grun um að hafa lengi langað í þessa breytingu. Það hefur aldrei verið látið eftir þeim fram fyrr en núverandi utanríkisráðherra virðist hafa gleypt þetta hrátt og án mikillar skoðunar á málinu.
Þegar svo er komið verða lausnamiðaðir menn að fara að velta fyrir sér: Eru einhverjar leiðir í land út úr þessu? Er hægt að bjarga manninum einhvern veginn út úr þessari vitleysu með andlitið á réttum stað? Er hægt að ná einhverju samkomulagi um að setja þetta mál til hliðar um sinn og fara með það í einhvern úttektarfarveg, bíða eftir niðurstöðu DAC sem menn hafa hér nefnt og annað í þeim dúr? Ég sé ekki í fljótu bragði annað vænlegra í stöðunni þó að það sé auðvitað ekki gott að einhver óvissa hangi þá áfram yfir málaflokknum.
Ég hef sannfærst enn betur um það, m.a. hér í dag, að það þarf að gera allt sem hægt er til þess að koma í veg fyrir að ráðherrann komist upp með þetta. Maður hlýtur að skora á þingmenn í öllum flokkum, ekki bara í stjórnarandstöðunni heldur líka í stjórnarflokkunum, að setjast nú niður og hugsa sinn gang. Ætla menn virkilega að láta þetta gerast? Eru allir með góða samvisku fyrir því að greiða þessum ósköpum atkvæði þegar málið er í raun og veru algerlega hrunið til grunna hvað varðar einhver haldbær rök?