áætlun um vernd og orkunýtingu landsvæða.
Frú forseti. Mig minnir að það séu tæp tvö ár, eitt og hálft, síðan nefndin skilaði af sér og þáverandi orkumálaráðherra lagði fram framkvæmdaáætlun byggða á orkustefnunni í september, október 2020, málefni til að takast á við í tengslum við þessi mál. Þannig að sú vinna fór af stað. Ég held að það hafi verið ágætisvinna og við þurfum bara að halda áfram á þessari vegferð. Tökum orkuskiptin, þessi þriðju, sem eru þá orkuskipti í samgöngum. Í umræðunni hefur algengasta talan verið, ef við tökum bílaumferðina á vegunum og flutningstæki þar, skipin okkar og flugið, 1.200 MW sem er fyrsti áfangi, 300 MW væru samgöngur á landi og bara til að setja þetta í samhengi í dag þá er aflgeta virkjana á Íslandi um 3.000 MW. Þetta eru 40%. En nota bene, þetta er kannski eitthvað sem kemur inn á 20 árum sirka. En ég sagði áðan að notkun hefur verið að aukast um 40–50 MW á hverju ári og það hefur kannski verið meira í almenna atvinnulífinu og í uppbyggingu á því. Nú höfum við líka verið að ræða fjarskiptin og takast á við þau og það er búið að byggja upp öflugt fjarskiptakerfi á Íslandi. Við ætlum að leggja áherslu á þessa fjórðu iðnbyltingu. Hún er bara um þetta, öflug fjarskipti og græna orku. Fjórða iðnbyltingin fer ekki fram nema með grænni orku.