fjárlög 2014.
Virðulegi forseti. Ég þakka hv. þingmanni fyrir ágæta ræðu. Ég neyðist því miður, vegna orða þingmannsins, til að ítreka að þessi áætlun ríkisstjórnarinnar var ekki fjármögnuð. Hv. þingmaður kveikti sjálf á þessari umræðu og neyðir mig til að segja það sem er að sjálfsögðu rétt. Við erum sammála, held ég, um að við þurfum að taka á þessu. Við þurfum að taka á innviðum í friðlýstum svæðum, við þurfum að byggja upp ferðamannastaðina þannig að þeir þoli áganginn og þetta allt saman. Ég held að okkur greini ekkert á um það.
Við horfum hins vegar fram á að verða að taka af og fresta ákveðnum hlutum í þessu fjárlagafrumvarpi og í þessari áætlun. Það er því miður staðreyndin. En það þýðir ekki að verkefnið sé slegið út af borðinu eða að menn hafi ekki skilning á því eða þá að það sé fundið léttvægt eða eitthvað svoleiðis. Við verðum einfaldlega að fresta ákveðnum hlutum og það er það sem er boðað þarna.