hugmyndir um útgönguskatt.
Virðulegur forseti. Það eina sem hefur gerst í málefnum þrotabúa föllnu bankanna frá því að þessi ríkisstjórn tók við er að hæstv. fjármálaráðherra hefur greitt hundruð milljarða í erlendum gjaldeyri inn á reikninga kröfuhafa án þess að fyrir liggi heildarlausn á vandanum. Það verður ekki betur séð en Framsóknarflokkurinn hafi forustulaust gefist upp við hugmyndir um það að niðurfæra þetta vandamál um 800 milljarða, eins og boðað var á síðunni snjohengjan.is fyrir síðustu kosningar. Ég hef, virðulegur forseti, verulegar áhyggjur af því að fjármálaráðherra sé að heykjast á verkefninu.
Þess vegna spyr ég hann hér að lokum hvort hann sé ekki enn þeirrar skoðunar að það sé úrslitaatriði fyrir íslenskt atvinnulíf og afkomu fólks og fyrirtækja hér í landinu á komandi árum að það fáist hundruð milljarða króna afskrifuð í uppgjöri föllnu bankanna.