fjárlög 2013.

Virðulegi forseti. Ég get tekið undir hvert orð sem hv. þm. Einar K. Guðfinnsson sagði um málið. Ég vil þó bæta því við að meiningin er að færa þá starfsmenn í aðalstöðvarnar sem áætlað er að fjölga um til að sjá um eftirlitið á Fiskistofu.

Ég spurði hæstv. ráðherra í skriflegri fyrirspurn um starfsmenn Hafrannsóknastofnunar og Fiskistofu og hvort til greina kæmi að færa þau verkefni út á land í auknum mæli, og hvort til stæði að færa höfuðstöðvar og annað í þeim dúr. Svörin voru þau að það væru engin áform uppi um slíkt.

Hér sjáum við óhófleg veiðigjöld sem leggjast á fyrirtækin með mjög ósanngjörnum hætti. Þau kosta umtalsverða peninga í stjórnsýslunni. Allar tekjurnar eru teknar af landsbyggðinni þar sem þessi atvinnugrein blómstrar og er undirstaða samfélagsins. Peningarnir eru færðir til Reykjavíkur í alls kyns gæluverkefni, eins og við höfum fjallað um hér, (Forseti hringir.) og líka til að standa undir auknum kostnaði við stjórnsýslu (Forseti hringir.) vegna þessara ólánslaga.