þjónusta við fatlað fólk með miklar stuðningsþarfir.
Frú forseti. Ég þakka hæstv ráðherra kynninguna og kýs að beina andsvari mínu að efni 40. gr. frumvarpsins sem við ræðum er varðar reglugerðarheimildir ráðherra. Í 40. gr. er að finna sjö málsgreinar sem hafa með reglugerðarheimildir ráðherra að gera þar sem fram kemur að ráðherra setji reglugerðir um nánari framkvæmd laga þessara, þar á meðal um eftirfylgni og dagsektir á hendur sveitarfélögum, skilyrði fyrir starfsleyfi til félagasamtaka, sjálfseignarstofnana og annarra einkaaðila sem ætla að veita þjónustu samkvæmt lögum þessum, sérstök húsnæðisúrræði, notendastýrða persónulega aðstoð, starfsemi og aðbúnað á skammtímadvalarstöðum, vistun barna utan heimilis, biðlistaforgangsröðun og úrræði á biðtíma. Ég vil spyrja hæstv. ráðherra hvort drög að einhverjum þessara reglugerða liggi fyrir, hvort til standi að klára þau fyrir gildistöku laganna og hvort Alþingi muni fá kynningu á þeim viðamiklu málasviðum sem reglugerðarheimildir ráðherra ná til. En aðalspurningin snýr að því (Forseti hringir.) hvort reglugerðirnar verði tilbúnar fyrir gildistöku laganna.