samningar um ábyrgð á endurgreiðslu Tryggingarsjóðs innstæðueigenda til breska og hollenska ríkisins.
Virðulegi forseti. Að mínu mati var þetta heldur rýrt og þunnt svar. Hv. þingmaður telur að fjárlaganefnd hafi ekki forsendur eða faglega þekkingu til að leggja mat á eignasafn hins fallna banka.
Hv. þingmaður taldi í ræðu sinni áðan að inni í Landsbankanum væru svo dýrmætar eignir að það yrði jafnvel afgangur þegar búið væri að gera málið upp. Þetta finnst mér einkennilegt, sér í lagi þegar kemur hér fram í andsvari að endurskoðunarskrifstofur hafi metið eignasafnið. Ég vil benda á að sú endurskoðunarskrifstofa sem kom mest að matinu á eignasafninu er náttúrlega bresk og Bretar sitja allt um kring eins og hrægammar í kringum málið.
Því spyr ég á ný, úr því að þingmaðurinn er svona vel að sér í eignasafni hins fallna Landsbanka sem á að greiða þetta: Hvers vegna eru þá þessir efnahagslegu fyrirvarar settir inn? Af hverju rífum við ekki (Forseti hringir.) frumvarpið og látum Breta og Hollendinga hirða þetta þrotabú?